अरे रिक्षा आहे की बस? तब्बल २७ प्रवासी बाहेर पडले; मोजता मोजता पोलीस चक्रावले

फतेहपूर: उत्तर प्रदेशच्या फतेहपूरमधील एका रिक्षाचा व्हिडीओ समोर आला आहे. रिक्षामध्ये जास्त प्रवासी असल्यानं पोलिसांनी चालकाला थांबवलं. त्यांनी सर्व प्रवाशांना रिक्षातून बाहेर येण्यास सांगितलं. रिक्षातून बाहेर येणाऱ्या प्रवाशांची मोजणी पोलिसांनी सुरू केली. रिक्षातून प्रवास करणाऱ्या प्रवाशांची संख्या मोजताना पोलीस चक्रावून गेले. कारण रिक्षात चालकासह एकूण २७ जण होते.

फतेहपूरमधील बिंदकी पोलीस ठाण्याच्या हद्दीतून जात असलेली एक रिक्षा पोलिसांनी रोखली. चालक अतिशय वेगात रिक्षा चालवत असताना ललौली चौकात पोलिसांनी रिक्षा अडवली. यानंतर पोलिसांनी रिक्षात बसलेल्या लहानमोठ्यांना उतरण्यास सांगितलं. पोलिसांनी प्रवाशांची मोजदाद केली. रिक्षात चालकासह २७ जण होते. यानंतर पोलिसांनी रिक्षा जप्त केली.

पोलीस रिक्षातून प्रवाशांना उतरवून त्यांची मोजणी करत असताना तिथे उपस्थित असलेल्या एकानं मोबाईलवर व्हिडीओ चित्रित केला. आता हा व्हिडीओ सोशल मीडियावर व्हायरल झाला आहे. रिक्षा चालकानं २७ प्रवाशांना कसं काय बसवलं, असा प्रश्न आता अनेकांना पडला आहे.