'मला मोनिका घुरडेंची पॉर्न क्लिप बनवायची होती'

मटा ऑनलाइन वृत्त । पणजी

'मला मोनिका घुरडे यांची पॉर्न क्लिप बनवायची होती. ही क्लिप बनवून त्यांना ब्लॅकमेल करण्याचा माझा हेतू होता. त्यासाठीच मी त्यांना चाकूच्या धाकावर नग्न केलं होतं,' अशी धक्कादायक कबुली परफ्युम एक्स्पर्ट व प्रख्यात फोटोग्राफर मोनिका घुरडे यांच्या मारेकऱ्यानं पोलिसांना दिली आहे.

गोव्यातील सनगोल्डा येथील घरात शनिवारी मोनिका घुरडे यांचा नग्नावस्थेतील मृतदेह आढळून आला होता. या प्रकरणी पोलिसांनी रविवारी मोनिका यांच्या सोसायटीचा आधीचा सुरक्षारक्षक २१ वर्षीय राजकुमार याला बेंगळुरूतून अटक केली. तो सध्या गोवा पोलिसांच्या ताब्यात असून त्यांची चौकशी सुरू आहे. राजकुमार यानं मोनिका यांची गळा दाबून हत्या केली होती.

पोलिसांनी दिलेल्या माहितीनुसार, राजकुमार चोरी करण्याच्या उद्देशानं घुरडेंच्या घरात घुसला होता. चाकूचा धाक दाखवून त्यानं घुरडे यांच्याकडून एटीएम व पिन नंबर घेतला. घुरडे यांनी आरडाओरडा व प्रतिकार केला असता त्यानं उशीच्या मदतीनं त्यांचं तोंड दाबलं. त्यामुळं घुरडेंचा प्रतिकार थांबला. त्या शांत झाल्या. त्यानंतर व्हिडीओ क्लिप बनवून ब्लॅकमेल करण्यासाठी राजकुमारनं त्यांचे कपडे काढले. घुरडे बेशुद्ध झाल्याचं समजून तो किचनमध्ये गेला. तिथं दोन अंडी उकडून खाल्ली. अंडी खाऊन तो परत आला, तेव्हाही घुरडे त्याला बेशुद्धावस्थेतच दिसल्या. त्याला संशय आला. घुरडे यांचा मृत्यू झाल्याचं लक्षात येताच त्यानं तात्काळ तिथून पळ काढला.

राजकुमार यानं हत्येची कबुली दिली असली तरी त्यानं खरोखरच मोनिका घुरडे यांची व्हिडीओ क्लिप बनविली आहे का?, तसंच, त्यानं मोनिका यांच्यावर काही लैंगिक अत्याचार केला का?,' याची चौकशी पोलीस करत आहेत.