केजरीवालांवर गुन्हा दाखल करण्याचे आदेश

वृत्तसंस्था, नवी दिल्ली

‘निवडणुकीच्या प्रचारसभेमध्ये लाच दिली जात असल्यासंदर्भातील वक्तव्य केल्याबद्दल दिल्लीचे मुख्यमंत्री अरविंद केजरीवाल यांच्यावर एफआयआर दाखल करावा,’ असे आदेश निवडणूक आयोगाने गोवा राज्यातील निवडणूक अधिकाऱ्यांना दिले आहेत.

‘अशा प्रकारची वक्तव्ये करण्यापासून निवडणूक आयोग रोखत असल्याने आयोग लाचखोरीला प्रोत्साहन देत असल्यासारखेच आहे,’ या केजरीवाल यांच्या वक्तव्याचाही निवडणूक आयोगाने समाचार घेतला आहे. केजरीवाल यांनी निवडणूक प्रचार मोहिमेत आदर्श आणि कायद्याला धरून असणारे वर्तन करणे अपेक्षित होते. प्रत्यक्षात मात्र त्यांनी पुन्हा आदर्श आचारसंहितेचा भंग केला आहे. त्यामुळे त्यांच्या विरोधात कायदेशीर कारवाई सुरू करायला हवी. एफआयआर दाखल करून त्याची सुरुवात करता येईल.’ असे आदेश आयोगाने म्हटले आहे.