नवी दिल्ली स्थानकात थांबलेल्या एक्स्प्रेसला आग

नवी दिल्ली:
नवी दिल्ली रेल्वे स्थानकात थांबलेल्या एक्स्प्रेसला शुक्रवारी दुपारी आग लागली. मिळालेल्या माहितीनुसार, चंदीगड-कोचिवली एक्स्प्रेसच्या पॉवर कारमध्ये दुपारच्या सुमारास भीषण आग लागली. अन्य दोन डब्यांपर्यंत आग पसरल्यानं स्थानकात काही वेळ गोंधळ निर्माण झाला होता.

रेल्वे स्थानकात ही एक्स्प्रेस थांबली होती. त्याचवेळी तिच्या पॉवर कारमधून धूर निघू लागला आणि त्यानंतर काही क्षणांतच आग लागली. थोड्या वेळात ही आग एक्स्प्रेसच्या अन्य दोन डब्यांमध्येही पसरली. आग लागल्याची माहिती मिळताच, आजूबाजूचे लोक पळू लागले. या घटनेत फलाटाचंही नुकसान झालं आहे. दरम्यान, या आगीत कोणतीही जीवितहानी अथवा जखमी झाले नाही. सर्व प्रवाशांना सुरक्षित बाहेर काढण्यात आले. अग्निशमन दलाच्या कर्मचाऱ्यांनी आग आटोक्यात आणली. आगीचं कारण अद्याप समजू शकलं नाही.