शहिदांच्या मुलांच्या स्कॉलरशीपमध्ये वाढ, मोदी सरकारचा पहिला निर्णय

नवी दिल्ली: दुसऱ्यांदा सत्तेत आल्यानंतर पंतप्रधान नरेंद्र मोदी यांनी शहिदांच्या मुलांच्या स्कॉलरशीपमध्ये वाढ करण्याचा पहिला आणि महत्त्वपूर्ण निर्णय घेतला आहे. नव्या सरकारच्या पहिल्या कॅबिनेटच्या बैठकीत हा निर्णय घेण्यात आला असून त्याबाबतचं ट्विटही मोदी यांनी केलं आहे.

आमच्या नव्या सरकारचा पहिला निर्णय देशाचं संरक्षण करणाऱ्यांसाठी समर्पित करतो, असं ट्विट करत पंतप्रधान नरेंद्र मोदी यांनी या निर्णयाची माहिती दिली आहे. नॅशनल डिफेन्स फंडात मोठे फेरबदल करून दहशतवादी आणि माओवादी हल्ल्यात शहीद झालेल्या जवानांच्या मुलांच्या स्कॉलरशीपमध्ये वाढ करण्यात आली आहे. मुलांची स्कॉलरशीप दरमहा २ हजार रुपयांवरून २५०० रुपयांपर्यंत वाढवण्यात आली असून मुलींची स्कॉलरशीप २२५० रुपयांवरून ३ हजार रुपये करण्यात आली आहे. मोदी सरकारच्या पहिल्याच कॅबिनेटच्या बैठकीत हा निर्णय घेण्यात आला. त्यानंतर पंतप्रधानपदाची दुसऱ्यांदा सूत्रे स्वीकारल्यानंतर मोदींनी स्कॉलरशीप वाढीच्या फाइलवर सही केली. याशिवाय पंतप्रधान विद्यार्थी स्कॉलरशीप योजनेचा विस्तार करण्यात आला आहे. त्यानुसार राज्यांतील शहीद पोलिसांच्या मुलांनाही या योजनेचा लाभ मिळणार आहे.