के. सिवन म्हणतात ‘मी सर्वांत पहिल्यांदा भारतीय’

वृत्तसंस्था, नवी दिल्ली

एका माध्यम प्रतिनिधीने 'एका तमिळ व्यक्तीला इतका मोठा सन्मान मिळाला, तेव्हा तुम्ही तमिळनाडूच्या जनतेला काय संदेश द्याल?', असा प्रश्न भारतीय अवकाश संशोधन संस्थेचे (इस्रो) अध्यक्ष डॉ. के. सिवन यांना विचारताच, त्यांनी 'प्रथमतः भारतीय आहे', असे उत्तर दिले. या उत्तराचे देशभरातून मोठ्या प्रमाणावर स्वागत करण्यात आले. अनेकांनी ट्विटरवरून सिवन यांच्या या उत्तराबद्दल त्यांची मुक्त कंठाने स्तुती केली आहे.

त्या माध्यम प्रतिनिधीशी संवाद साधताना डॉ. के. सिवन म्हणाले, 'मी इस्रोमध्ये एक भारतीय म्हणून आलो. सर्व भाषा व धर्म एकत्र येऊन कार्यरत रहात योगदान देणारी इस्रो ही संस्था आहे. अशा संस्थेत मी काम करत असून माझे बांधव माझी स्तुती करत आहेत, हे माझे भाग्य आहे.'

डॉ. सिवन यांच्या या उत्तरावर नेटकर बेहद्द खुश झाले. आपली राष्ट्रीय ओळख हीच खरी ओळख असल्याचे सिवन यांनी सांगितल्यामुळे नेटकरांनी त्यांचे ट्विटरवरून अभिनंदन केले.

चांद्ररात्रीचा धोका कायम

बंगळुरू ः चंद्रावर सॉफ्ट लॅण्डिंग करण्याच्या प्रयत्नात इस्रोशी संपर्क तुटलेल्या विक्रम लँडरने चंद्रावर अवतरण केले असल्याचा अंदाज इस्रोने वर्तवल्यानंतर विक्रमशी संपर्क जोडण्याचे युद्धपातळीवर प्रयत्न सुरू आहेत. १.४ टन वजनाचा विक्रम लँडर त्यातील प्रज्ञान या रोव्हरसमवेत ७ सप्टेंबरपासून चंद्राच्या दक्षिण ध्रुवावरील एका स्थळी असल्याचे ऑर्बिटरने पाठवलेल्या छायाचित्रावरून स्पष्ट झाले आहे. विक्रमशी संपर्क साधण्याचा प्रयत्न १४ दिवस केला जाईल, असे इस्रोचे अध्यक्ष डॉ. के. सिवन यांनी सांगितले आहे. १४ दिवसांनंतर चंद्रारात्र सुरू होईल. यामुळे लँडरला सौरऊर्जेचा पुरवठा होणे मुश्किल होईल. म्हणूनच इस्रोकडून विक्रमशी ऑर्बिटर लिंकच्या साह्याने संपर्क साधण्याचे जोरदार प्रयत्न केले जात आहेत, असे अधिकृत सूत्रांकडून समजते.