पाच न्यायाधीशांची अखेर नियुक्ती; कॉलेजियमच्या शिफारशी 'पीएमओ'कडून मंजूर

नवी दिल्ली : सर्वोच्च न्यायालयात पाच न्यायाधीशांची शनिवारी नियुक्ती करण्यात आली. त्यामुळे सर्वोच्च न्यायालयातील न्यायाधीशांची संख्या ३२ झाली असून, अद्याप दोन न्यायाधीशांची पदे रिक्त आहेत. न्यायाधीश नियुक्तीच्या कॉलेजियम पद्धतीवरून न्यायालय आणि सरकारमधील मतभेदांच्या पार्श्वभूमीवर कॉलेजियमने पाठवलेल्या पाच नावांना मंजुरी मिळून या नियुक्त्या झाल्या आहेत.

न्या. पंकज मित्तल (राजस्थान उच्च न्यायालयाचे मुख्य न्यायमूर्ती), न्या. संजय कारोल (पाटणा उच्च न्यायालयाचे मुख्य न्यायमूर्ती), न्या. पी. व्ही. संजयकुमार (मणिपूर उच्च न्यायालयाचे मुख्य न्यायमूर्ती), न्या. अशनुद्दीन अमानुल्लाह (पाटणा उच्च न्यायालयातील न्यायाधीश) आणि न्या. मनोज मिश्रा (अलाहाबाद उच्च न्यायालयातील न्यायाधीश) या पाच जणांची सर्वोच्च न्यायालयात न्यायाधीशपदी नियुक्ती झाल्याचे कायदामंत्री किरेन रिजिजू यांनी जाहीर केले. पंतप्रधान कार्यालयाने २ फेब्रुवारीला या नावांना मंजुरी देऊन, ही नावे नियुक्तीच्या मंजुरीसाठी राष्ट्रपती भवनाकडे पाठवली होती.

सध्या सर्वोच्च न्यायालयात सरन्यायाधीशांसह २७ न्यायाधीश कार्यरत आहेत. सर्वोच्च न्यायालयातील न्यायाधीशांची एकूण पदे ३४ असून, दोन पदे रिक्त आहेत. या पार्श्वभूमीवर कॉलेजियमने ३१ जानेवारीला न्या. राजेश बिंदाल (अलाहाबाद उच्च न्यायालयाचे मुख्य न्यायमूर्ती) आणि न्या. अरविंद कुमार (गुजरात उच्च न्यायालयाचे मुख्य न्यायमूर्ती) यांची नावे सर्वोच्च न्यायालयात न्यायाधीशपदी नियुक्तीसाठी सरकारकडे पाठवली आहेत. आधी सुचविलेल्या पाच नावांना मंजुरी मिळण्याआधीच कॉलेजियमने तीन दिवसांपूर्वी अनपेक्षितपणे आणखी दोन नावे सरकारकडे पाठवली होती. सर्वसाधारणपणे आधीची नावे मंजूर झाल्याशिवाय कॉलेजियम नवीन नावे सुचवित नाही.

उद्या शपथ?

सरन्यायाधीश धनंजय चंद्रचूड यांच्या अध्यक्षतेखालील सर्वोच्च न्यायालयाच्या कॉलेजियमने १३ डिसेंबरला या पाच जणांच्या नावांची शिफारस केंद्र सरकारकडे केली होती. हे पाचही न्यायाधीश उद्या, सोमवारी पदाची शपथ घेतील, अशी शक्यता सर्वोच्च न्यायालयातील सूत्रांनी वर्तवली.

३४
सर्वोच्च न्यायालयात न्यायमूर्तींची मंजूर पदे

५
शनिवारी नियुक्त झालेले नवे न्यायमूर्ती

२
न्यायमूर्तींची अद्याप असलेली रिक्त पदे