Maoists: झारखंडमध्ये पाच माओवाद्यांचा खात्मा

लातेहार: झारखंडचे मुख्यमंत्री रघुवर दास यांच्या लातेहार-पलामू दौऱ्याच्या आधी आज सुरक्षा दलाने नक्षलवाद्यांविरोधात मोठी कारवाई करून यश मिळविले आहे. लातेहारमध्ये माओवादी आणि सुरक्षा दलादरम्यान झालेल्या चकमकीत पाच माओवादी ठार झाले आहेत. पाच लाखाचे बक्षिस असलेला माओवाद्यांचा झोनल कमांडर श्रवण यादवही या चकमकीत ठार झाला आहे. हे सर्व माओवादी सीपीआयशी संबंधित असून त्यांच्याकडून मोठ्याप्रमाणावर शस्त्रास्त्रं जप्त करण्यात आली आहेत.

झारखंड पोलिसांचे प्रवक्ते आणि अतिरिक्त पोलीस महासंचालक आर. के. मलिक यांनी ही माहिती दिली. पोलीस आणि सुरक्षा दलाला लातेहारच्या भरगांवमध्ये माओवादी लपल्याची खबर मिळाली होती. त्यामुळे काल संध्याकाळीच या परिसराला घेराव घालून माओवाद्यांना आत्मसमर्पण करण्याचे आवाहन करण्यात आले होते. मात्र माओवाद्यांनी उलट गोळीबार केला. त्यामुळे पोलीस आणि सुरक्षा दलाने त्यांना प्रत्युत्तर देण्यासाठी केलेल्या गोळीबारात पाच कट्टर माओवादी मारले गेले, असं मलिक यांनी सांगितलं.

रवींद्र गंझू, शिवलाल आणि श्रवण या माओवाद्यांच्या गटांबरोबर ही चकमक झाली. त्यात श्रवणसह पाच माओवाद्यांचा खात्मा करण्यात आला. यावेळी पोलिसांनी या माओवाद्यांकडून तीन एके-४७, रायफल आणि त्याशिवाय इतरही शस्त्रास्त्रसाठा जप्त केला आहे.