नंदुरबारच्या धडगाव तालुक्यातील घटना
..
म. टा. वृत्तसेवा, धुळे
नंदुरबार जिल्ह्यात नर्मदा नदीतील बॅकवॉटरमध्ये मंगळवारी बोट उलटल्याने पाच जणांचा बुडून मृत्यू झाला. धडगाव तालुक्यापासून १५ किलोमीटर अंतरावरील भुश्या पॉईंटजवळ दुपारी अडीच वाजेच्या सुमारास ही दुर्घटना घडली. मृतांमध्ये चार बालकांचा समावेश असून, तिघे बालके एकाच कुटुंबातील आहेत. अन्य ३७ जण अत्यवस्थ असून, एकाची प्रकृती गंभीर असल्याचेही समजते.
मकर संक्रांतीनिमित्त नदीपूजनासाठी जाताना क्षमतेपक्षा अधिक प्रवासी झाल्याने बोट उलटल्याचा अंदाज आहे. भुपेंद्र भरत पावरा (९), लक्ष्मी भरत पावरा (४), तुलसी भरत पावरा (५), गीता दिलदार पावरा (१२), मानू काल्या पावरा (६०) अशी मृतांची नावे आहेत. नर्मदेच्या काठावरील तेलखेडी गाव परिसरातील लोक दरवर्षी मकरसंक्रांतीनिमित्त नदी पूजन तसेच, स्नानासाठी जातात. मंगळवारी काठापासून जवळच असताना ही बोट उलटली. बोटीमध्ये क्षमतेपेक्षा जास्त प्रवासी बसवण्यात आले होते, अशी प्राथमिक माहिती जिल्हा प्रशासनाने दिली. अत्यवस्थ अवस्थेतील काही जणांना उपचारासाठी धडगाव ग्रामीण रुग्णालयात, तर काहींना नंदुरबार व धुळे जिल्हा रुग्णालयात दाखल करण्यात आले. नर्मदा नदीचे बॅकवॉटर धडगाव तालुक्यातील अनेक गावांमध्ये पसरल्याने या भागात ये-जा करण्यासाठी बोटींचा वापर केला जातो.
...
गावकऱ्यांकडून मदतीचा हात
दुर्घटनेची माहिती मिळताच जवळपासच्या पाड्यांवरील लोकांनी बुडालेल्यांना बाहेर काढण्यासाठी पाण्यात उड्या घेतल्या. काही जणांना तत्काळ बाहेर काढण्यात आले. मृत व सर्व जखमी तेलखडी गाव तसेच परिसरातील आहेत. घटनास्थळ नंदुरबार शहरापासून साधारण चार ते पाच तासांच्या अंतरावर आहे. त्यामुळे मदतकार्यसाठी प्रशासनासह सर्व यंत्रणांना तब्बल चार तास लागले.