कुपवाडा जिल्ह्यात हिमस्खलन; ५ जवान अडकले

मटा ऑनलाइन वृत्त । नवी दिल्ली

जम्मू-काश्मीरमध्ये पुन्हा एकदा हिमस्खलनाचा मोठा तडाखा बसला आहे. राज्यातल्या उत्तर भागातल्या कुपवाडा जिल्ह्यात हिमस्खलन होऊन त्यात ५ जवान अडकले आहेत.

'पाच जवान बर्फाखाली अडकले आहेत, बचावकार्य सुरू आहे,' अशी माहिती श्रीनगरचे संरक्षण प्रवक्ते कर्नल राजेश कालिया यांनी टाईम्स ऑफ इंडियाला दूरध्वनीवरून दिली.

माछील क्षेत्रातील लष्कराच्या छावणीजवळ हे ५ सैनिक गस्त घालत होते. हिमस्खलनामुळे ते अनेक फूट खाली गाडले गेले, अशी माहिती लष्कराच्या प्रवक्त्याने दिली. यापूर्वी दोनच दिवसांपूर्वी गुरेझ क्षेत्रालाही हिमस्खलनाचा मोठा तडाखा बसला होता. यात १५ जवानांचा मृत्यू झाला होता. यापैकी ३ सैनिक महाराष्ट्रातले होते.