काश्मीरः दहशतवाद्याला आई-वडिलांची आर्त हाक, अखेर...

श्रीनगरः जम्मू-काश्मीरमध्ये सुरक्षा दलांकडून आज दोन वेगवेगळ्या ठिकाणी दहशतवाद्यांविरोधात कारवाई करण्यात आली. या कारवाईत एकूण ५ दहशतवादी ठार झाले आहेत. यात सुरक्षा दालांचे दोन जवानही जखमी झाले आहेत.

जम्मू-काश्मीरच्या शोपियान जिल्ह्यांत सुरक्षा दलांची दहशतवाद्यांविरोधात रात्रभर कारवाई सुरू होती. शनिवारी एक दहशतवादी ठार झाला होता. दक्षिण काश्मीरमधील शोपियान जिल्ह्यात हादीपुरामध्ये सुरक्षा दलांचे जवान आणि दहशतवाद्यांमध्ये चकमक उडाली. चकमकीत ठार झालेल्या दहशतवाद्यांची संख्या वाढून आता ३ झाली आहे, अशी माहिती पोलिसांनी दिली.

हादीपुरामधील कारवाईत आज आणखी दोन दहशतवादी ठार झाले. ठार झालेल्या दोन दहशतवाद्यांपैकी एक अलिकडेच संघटनेट सामील झाला होता. सुरक्षा दलांनी त्याला शरण येण्याचं आवाहनही केलं होतं.

आम्ही दहशतवाद्याच्या आई-वडिलांना चकमकीच्या ठिकाणी आणलं होतं. त्यांनी मुलाला शरण येण्याचं आवाहन केलं. त्याला शरण यायचं होतं. पण त्याच्या साथीदाराने त्याला अडवलं, अशी माहिती पोलीस महानिरीक्षक विजय कुमार यांनी दिली.

हादीपुरामध्ये दहशतवादी असल्याची माहिती सुरक्षा दलांना मिळाली होती. त्यानंतर सुरक्षा दलाच्या जवानांनी वेढा घालून शोध मोहीम सुरू केली. यानंतर सुरक्षा दलाचे जवान आणि दहशतवाद्यांमध्ये चकमक उडाली. या भागात अजूनही शोध मोहीम सुरू आहे.

लक्षद्वीपजवळ अमेरिकेच्या नौदलाची घुसखोरी, भारताकडून चिंता व्यक्त

अनंतनागमधील आणखी एका कारवाईत दोन दहशतवादी ठार झाले. ठार झालेले दोन्ही दहशतवादी हे टेरिटोरियल आर्मीतील जवान मोहम्मद सलीम यांच्या हत्येत सामील होते. गेल्या तीन दिवसांमध्ये काश्मीरमध्ये वेगवेगळ्या चकमकीत १२ दहशतवादी ठार झाले आहेत.