ईशान्येकडील रेल्वेसेवा बंद

आसाम, बिहारमधील पुराचा पंतप्रधानांकडून आढावा

वृत्तसंस्था, नवी दिल्ली

आसाम, पश्चिम बंगाल आणि बिहारमधील पुराच्या पार्श्वभूमीवर ईशान्येकडील रेल्वेसेवा बुधवारपर्यंत बंद करण्यात आली आहे. पंतप्रधान नरेंद्र मोदी यांनी सोमवारी आसामचे मुख्यमंत्री सर्वानंद सोनोवाल आणि बिहारचे मुख्यमंत्री नितीशकुमार यांच्याशी फोनवरून चर्चा करून राज्यातील पूरस्थितीचा आढावा घेतला; तसेच पूरस्थितीचा सामना करण्यासाठी केंद्र सरकारकडून सर्वतोपरी मदत करण्यात येईल, असे आश्वासनही दिले.

रेल्वे मंडळाने देशाच्या अन्य भागांतून ईशान्येकडे जाणाऱ्या सर्व गाड्या १६ ऑगस्टच्यापर्यंत रद्द केल्याचे रेल्वेचे मुख्य जनसंपर्क अधिकारी प्रणव ज्योती शर्मा यांनी स्पष्ट केले आहे. आसाममध्ये उद्भवलेल्या पूरस्थितीमुळे आतापर्यंत जवळपास ९९ जणांचा मृत्यू झाला आहे आणि २१ जिल्ह्यांतील २२.५ लाख जणांना पुराचा फटका बसला आहे, अशी माहिती सरकारने दिली आहे. नेपाळ आणि सीमांचल भागांतील अतिवृष्टीमुळे बिहारमधील महानंदा व कनकी अशा नद्यांना आलेल्या पुराचा चार जिल्ह्यांना फटका बसला आहे.

रविवारीही पंतप्रधानांनी सोनोवाल यांच्याकडून फोनवरून माहिती घेतली होती. बिहार आणि आसाममधील पूरस्थितीचा सामना करण्यासाठी केंद्र सरकारकडून सर्वतोपरी मदत करण्यात येईल,’ असे पंतप्रधान कार्यालयाने ‘ट्विटर’वर म्हटले आहे.

नितीशकुमार यांनी पूरग्रस्त जिल्ह्यांमध्ये बचावासाठी ‘एनडीआरएफ’च्या दहा अतिरिक्त तुकड्या तैनात करण्यात याव्यात, अशी मागणी केली. ती पूर्ण करण्यात येईल, असे सांगण्यात आले; तसेच पंतप्रधानांचे प्रधान सचिव नृपेंद्र मिश्रा यांनी आसामच्या मुख्य सचिवांना पुरामुळे झालेल्या नुकसानीचा अहवाल सादर करण्याची सूचना दिली आहे.