लालूंना कोणती शिक्षा? आज होणार फैसला

रांची : चारा घोटाळ्याप्रकरणी राष्ट्रीय जनता दलाचे अध्यक्ष लालूप्रसाद यादव यांच्या शिक्षेचा फैसला विशेष सीबीआय न्यायालयाने गुरुवारी पुन्हा एकदा, एका दिवसाने शुक्रवारपर्यंत पुढे ढकलला. त्यामुळे शुक्रवारी व्हिडीओ कॉन्फरन्सिंगच्या माध्यमातून किंवा प्रत्यक्ष न्यायालयात लालूप्रसाद यांच्या शिक्षेची घोषणा होण्याची शक्यता आहे. दरम्यान, आपल्याला लालूप्रसाद यांच्या हितचिंतकांकडून फोन येत असल्याचे सीबीआय न्यायाधीश शिव पाल सिंह यांनी सांगितले. मात्र याबाबत अधिक माहिती त्यांनी दिली नाही.

देवघर खजिन्यातून ८९ लाख रु. बेकायदा काढल्याच्या या प्रकरणी लालू यांना दोषी ठरवण्यात आले आहे. शिक्षेची घोषणा न्यायालयात करायची की व्हिडीओ कॉन्फरन्सद्वारे याचा निर्णय शुक्रवारी घेण्यात येईल, असे न्यायाधीशांनी स्पष्ट केले. आपण वैयक्तिकरित्या न्यायालयात हजर राहू असे सांगत न्यायालयात समर्थकांकडून घोषणाबाजी केली जाणार नाही, अशी ग्वाही लालूंनी दिली.