लालूंना मिळणार महिना १० हजार रुपये पेन्शन

मटा ऑनलाइन वृत्त । पाटणा

राष्ट्रीय जनता दलाचे अध्यक्ष लालू प्रसाद यादव यांनी चक्क पेन्शनसाठी अर्ज केला आहे. विशेष म्हणजे त्यांचा अर्ज पडताळणीनंतर पात्र ठरल्याने त्यांना महिनाकाठी १० हजार रुपये पेन्शन मिळणार आहे. बिहारच्या गृहमंत्रालयाने यादव यांच्या पेन्शन अर्जाला मंजुरी दिली आहे. मिसा कायद्यांतर्गत तुरुंगवास भोगल्याने लालू या पेन्शनला पात्र ठरले आहेत.

जे.पी. सेनानी सम्मान योजनेंतर्गत लालूंनी अर्ज केला होता. ही योजना मुख्यमंत्री नितीश कुमार यांनी त्यांच्या मुख्यमंत्रीपदाच्या पहिल्या कार्यकाळात जाहिर केली होती. ज्येष्ठ स्वातंत्र्यसैनिक जयप्रकाश नारायण यांच्या स्मरणार्थ सुरू झालेल्या या योजनेचा आतापर्यंत ३ हजार जणांनी लाभ घेतला आहे. यात भाजपचे ज्येष्ठ नेते सुशील कुमार मोदी यांचाही समावेश आहे.

'लालूंचा अर्ज वैध ठरल्याने गृहमंत्रालयाने ट्रेझरी आणि संबंधित बॅंकेला लालूंच्या पेन्शनचे पैसे देण्याचे आदेश दिले आहेत,' असे गृहमंत्रालयाच्या एका वरिष्ठ अधिकाऱ्याने टाइम्स ऑफ इंडियाला बुधवारी सांगितले. लालूंना ही पेन्शन २००९ पासून पूर्वलक्षी प्रभावाने मिळणार आहे.

जयप्रकाश नारायण यांनी 'संपूर्ण क्रांती'चा नारा दिला तेव्हा लालू प्रसाद यादव विद्यार्थी नेते होते. मेंटनन्स ऑफ इंटरनल सिक्युरिटी अॅक्ट (मिसा) अंतर्गत त्यांनी बाँकीपूर तुरुंगात तुरुंगवास भोगला होता. मिसा किंवा डिफेन्स ऑफ इंडिया रुल्सअंतर्गत १८ मार्च १९७४ ते २१ मार्च १९७७ या कालावधीत सहा महिन्यांपेक्षा अधिक काळ तुरुंगवास भोगलेले सर्वजण जे.पी. सेनानी सम्मान योजनेंतर्गत दरमहा १० हजार रुपये पेन्शन मिळण्यास पात्र आहेत.