गोवाः माजी मुख्यमंत्री शशिकला काकोडकर कालवश

मटा ऑनलाइन वृत्त । पणजी

गोव्याच्या पहिल्या महिला मुख्यमंत्री आणि महाराष्ट्रवादी गोमंतक पक्षाच्या प्रमुख नेत्या शशिकला काकोडकर यांचं आज अल्पशा आजाराने निधन झाले. त्या ८१ वर्षांच्या होत्या. गोव्याचे पहिले मुख्यमंत्री दयानंद बांदोडकर यांच्या त्या कन्या होत्या.

१९७३ मध्ये, दयानंद बांदोडकर यांच्या निधनानंतर शशिकला बांदोडकर यांनी मुख्यमंत्रिपदाची धुरा समर्थपणे सांभाळली होती. १९७९ पर्यंत त्यांनी मुख्यमंत्रिपद भूषवलं होतं. त्यानंतर, ९०च्या दशकात शिक्षणमंत्री म्हणून त्यांची कारकीर्द महत्त्वपूर्ण ठरली. गोव्यातील प्राथमिक शिक्षणात मराठी शिकवणं बंधनकारक करण्याबाबत त्या आग्रही होत्या आणि त्यासाठी त्यांनी शर्थीचे प्रयत्नही केले होते. भारतीय भाषा सुरक्षा मंच या गोव्यातील संघटनेचे अध्यक्षपद शशिकला काकोडकर यांनी भूषवलं होतं.

गोव्यात सध्या मातृभाषेचा मुद्दा गाजतोय. शिक्षणात मातृभाषेला मानाचं स्थान मिळावं, यावरून राजकारणही पेटलंय. अशावेळी, शशिकला काकोडकर यांचं निधन गोवेकरांना चटका लावून जाणारंच आहे.