इस्रोचे माजी अध्यक्ष यू. आर.राव यांचं निधन

मटा ऑनलाइन वृत्त । नवी दिल्ली

इस्रोचे माजी अध्यक्ष, भारताच्या अंतराळ मोहिमेत योगदान देणारे थोर शास्त्रज्ञ यू. आर. राव यांचं रविवारी रात्री २. ३० वाजता निधन झालं. ते ८५ वर्षाचे होते. त्यांना हृदयविकाराचा त्रास होता. जानेवारीपासून ते रूग्णालयात उपचार घेत होते.

गेल्या सात महिन्यापासून राव यांना हृदयविकाराचा त्रास जाणवत होता. त्यामुळे त्यांना रूग्णालयात भरती करण्यात आले होते. काल त्यांची प्रकृती आणखीनच ढासळल्याने रात्री अडिच वाजता त्यांची प्राणज्योत मालवली. राव यांच्या निधनावर पंतप्रधान नरेंद्र मोदी यांनी तीव्र दु:ख व्यक्त केलं आहे. 'राव यांच्या निधनाने दु:खी झालोय. भारताच्या अंतराळ मोहिमेत त्यांचं योगदान मोठं होतं. ते कदापि विसरता येणार नाही, अशा शब्दात मोदी यांनी राव यांना श्रद्धांजली वाहिली आहे.

यू. आर. राव यांनी एम.जे. के. मेनन, सतीश धवन, आणि विक्रम साराभाईंसारख्या महान शास्त्रज्ञांसोबत काम केलं होतं. भौतिक संशोधन प्रयोगशाळेच्या गव्हर्निंग कॉन्सिलचे चेअरमन म्हणून ते कार्यरत होते. तिरूवनंतपूरममध्ये इंडियन इन्स्टिट्यूट ऑफ सायन्स अँड टेक्नॉलॉजीचे ते कुलगुरू होते. परदेशातील विद्यापीठांमधील कामांची जबाबदारीही त्यांनी सांभाळली होती. त्यांच्या कार्याची दखल घेऊन त्यांना पद्मविभूषण देऊन भारत सरकारने गौरविले होते.