डॉ. मनमोहन सिंग यांची प्रकृती स्थिर, रुग्णालयाच्या सूत्रांची माहिती

नवी दिल्ली: एम्समध्ये उपचार घेत असलेले माजी पंतप्रधान डॉ. मनमोहन सिंग याची प्रकृती स्थिर असल्याचे एम्सच्या सूत्रांनी सांगितले. डॉ. सिंग हे डॉक्टरांच्या देखरेखीखाली असून त्यांच्या तपासण्या सुरू आहेत. त्यांनी नवे औषध घेतल्यानंतर त्यांच्या शरीरात काही प्रमाणात रिअॅक्शन झाली होती. त्यानंतर ताप येऊ लागला, असे सूत्रांनी सांगितले.

८७ वर्षीय डॉ. सिंग यांना रविवारी अस्वस्थ वाटू लागल्याने त्यांना एम्समध्ये दाखल करण्यात आले. डॉ. सिंग यांच्या शरिरात औषधाचे रिअॅक्शन कसे झाले आणि त्यांना ताप नेमका कोणत्या कारणाने येत आहे, याची तपासणी सुरू असल्याचे वृत्त टाइम्स ऑफ इंडियाने दिले आहे.

त्यांना ताप येण्याची आणखी काही कारणे आहेत का, याचीही तपासणी करण्यात येत आहे.

डॉ. मनमोहन सिंग हे राज्यसभेचे सदस्य आहेत. ते राजस्थानमधून राज्यसभेवर आले आहेत. ते सन २००४ ते २०१४ या कालावधीत देशाचे पंतप्रधान होते. डॉ. सिंग यांच्यावर हृदयाची यशस्वी बायपास सर्जरी करण्यात आली होती. डॉ. सिंग यांची प्रकृती लवकरात लवकर ठणठणीत व्हावी अशा सदिच्छा अनेक नेत्यांनी दिल्या आहेत.