तरुण तेजपाल यांच्यावर आरोप निश्चित

मटा ऑनलाइन वृत्त । पणजी

हॉटेलच्या लिफ्टमध्ये सहकारी महिला पत्रकाराचं लैंगिक शोषण केल्याप्रकरणी 'तहलका'चे संस्थापक आणि माजी मुख्य संपादक तरुण तेजपाल यांच्यावर आज गोव्यातील म्हापसा सत्र न्यायालयाने आरोप निश्चित केले.

२०१३ मध्ये ही घटना घडली होती. गोव्यात आयोजित थिंक फेस्टदरम्यान एका फाइव्ह स्टार हॉटेलच्या लिफ्टमध्ये तरुण तेजपाल यांनी आपल्या सहकारी महिला पत्रकाराचे लैंगिक शोषण केले होते. त्यानंतर पीडीत महिलेने आपल्या वरिष्ठ सहकारी महिलेला या घटनेची कल्पना दिली होती. त्यावेळी मीडियात पीडिता, तेजपाल आणि तहलकाच्या तत्कालीन व्यवस्थापकीय संपादिका शोमा चौधरी यांच्यात ई-मेलच्या माध्यमातून झालेला संवादही प्रसिद्ध झाला होता. नंतर रितसर तक्रार होऊन तेजपाल यांना अटक करण्यात आली होती.

दरम्यान, तेजपाल यांनी आपल्याविरोधातील आरोप हटवण्यात यावेत अशी मागणी म्हापसा सत्र न्यायालयाकडे केली होती. ही मागणी ७ सप्टेंबर रोजी म्हापसा न्यायालयाने फेटाळली. त्यानंतर आपल्याविरोधात आरोप निश्चित करण्यास मनाई करण्यात यावी अशी आव्हान याचिका तेजपाल यांनी मुंबई उच्च न्यायालयाच्या गोवा खंडपीठात केली होती. मात्र तेजपाल यांची ही याचिका दोनच दिवसांपूर्वी फेटाळण्यात आली. या पार्श्वभूमीवर आज म्हापसा सत्र न्यायालयाने तेजपाल यांच्यावर आरोप निश्चित केल्याने तेजपाल यांच्या अडचणी वाढल्या आहेत.

पुढील सुनावणी २१ नोव्हेंबर रोजी

तेजपाल यांच्यावर बलात्कार, लैंगिक शोषण व अन्य कमलांखाली आरोप निश्चित करण्यात आले आहेत. आरोपपत्राची प्रतही तेजपाल यांना देण्यात आली आहे. तेजपाल यांच्या वकिलांनी एक महिन्याचा वेळ मागितला होता मात्र तो देण्यास न्यायालयाने नकार दिला. याबाबत सरकारी वकिलांनी न्यायालयाबाहेर माध्यमांना माहिती दिली. न्यायालयाने तेजपाल यांना त्यांच्याविरोधात निश्चित करण्यात आलेल्या आरोपांची कल्पना दिली आहे. यादरम्यान आपण निर्दोष असल्याचे तेजपाल यांनी सांगण्याचा प्रयत्न केला मात्र न्यायालयाने ते मान्य केले नाही. याप्रकरणी पुढील सुनावणी २१ नोव्हेंबर रोजी होणार आहे, असे सरकारी वकिलांनी सांगितले.