बापरे! ३८८ ड्रायव्हर, ३४५ जणांचा एकच नंबर; १८ बँक खाती अन् १ कोटीचा चुना; Uberला मोठा गंडा

दिल्ली: उबराच्या एका कर्मचाऱ्यानं कंपनीला गंडा घातला आहे. कर्मचाऱ्यानं कंपनीची एक कोटी रुपयांपेक्षा अधिकची फसवणूक केली. कर्मचारी कित्येक महिने घोटाळा करत होता. मात्र कंपनीला याची जराही कल्पना नव्हती. कर्मचाऱ्यानं राजीनामा दिला, कंपनी सोडली, त्यावेळी हा प्रकार उघडकीस आला. या प्रकरणी उबर कंपनीनं एफआयआर दाखल केला आहे. पोलीस आरोपीचा शोध घेत आहेत.

घटना उबरच्या गुरुग्रामच्या कार्यालयात घडली आहे. या प्रकरणी कंपनीनं गुरुग्रामच्या सुशांत लोक पोलीस ठाण्यात एफआयआर दाखल केला. त्यानुसार घटना २०२१ मधील आहे. आरोपी कर्मचारी गुरुग्राम कार्यालयात कार्यरत होता. ऑगस्ट २०२१ मध्ये तो रुजू झाला. त्याला कंत्राटावर नेमण्यात आलं होतं.
भयंकर! ऑपरेशनवेळी मुलीचे अवयव चोरले; शरीरात पॉलिथिनच्या पिशव्या भरल्या अन् मग...
आरोप कर्मचाऱ्याकडे कंपनीशी संबंधित कॅब चालकांच्या बँक खात्यावर रक्कम जमा करण्याची जबाबदारी होती. त्यावेळी त्यानं अतिशय चलाखीनं सर्व्हरशी छेडछाड केली आणि बोगस चालक सिस्टिमवर जोडले. या बोगस चालकांची संख्या ३८८ होती. यानंतर कर्मचाऱ्यानं बोगस चालकांच्या खात्यावर पैसे पाठवण्यास सुरुवात केली. त्यानं हळूहळू करून बोगस चालकांच्या खात्यांमध्ये १.१७ कोटी रुपये पाठवले.

आरोपीनं ३८८ बोगस कर्मचाऱ्यांची माहिती सिस्टिमवर जमा केली. त्यापैकी ३४५ जणांना फोन नंबर एकच होता. मात्र त्यांची नावं वेगवेगळी होती. या ३८८ जणांना पाठवण्यात आलेले पैसे केवळ १८ बँक खात्यांमध्ये गेले होते. याचा अर्थ एका बँक खात्यावर अनेक ड्रायव्हर्स लिंक करण्यात आले होते.
अरेरे! आंघोळीला गेलेल्या नववधूचा करुण अंत; हातावरची मेहंदी जाण्याआधी मृत्यूनं गाठलं
आरोपीनं एखाद्या ऑटोमॅटिक टूलचा वापर केला असावा. त्यामुळे त्यानं केलेला घोटाळा लगेच पकडला गेला नाही, असं गुरुग्राम पोलिसांनी सांगितलं. अनेक दिवस घोटाळा सुरुच होता. डिसेंबर २०२१ मध्ये कर्मचाऱ्यानं कंपनी सोडली. त्यानंतर कित्येक महिन्यांनंतर हेराफेरी उघड झाली. आता पोलीस आरोपीचा शोध घेत आहेत.