केजरीवाल जगातील महान नेत्यांच्या यादीत

मटा ऑनलाइन वृत्त । नवी दिल्ली

भाजप, काँग्रेससारख्या बलाढ्य देशव्यापी पक्षांना धूळ चारून निर्विवाद बहुमतानं निवडणूक जिंकणारे आणि जनतेमध्ये आकर्षण निर्माण करणारे दिल्लीचे मुख्यमंत्री अरविंद केजरीवाल यांना जगातील ५० महान नेत्यांच्या यादीत स्थान मिळाले आहे. विशेष म्हणजे, गेल्या वर्षी पाचव्या क्रमांकावर असलेले पंतप्रधान नरेंद्र मोदी व सर्वशक्तीमान 'अमेरिके'चे राष्ट्राध्यक्ष बराक ओबामा यांना यादीत स्थान मिळालेलं नाही.

आंतरराष्ट्रीय पातळीवरील 'फॉर्च्युन' मासिकानं ५० महान नेत्यांची यादी प्रसिद्ध केली आहे. 'अॅमेझॉन'चे संस्थापक जेफ बेजोस हे यादीत पहिल्या स्थानावर आहेत. तर, पोप फ्रान्सिस, आंग सान सू ची आणि बांगलादेशच्या पंतप्रधान शेख हसीना यांनाही यादीत स्थान मिळालं आहे. भारतातून केवळ केजरीवाल यांचं नाव असून महान नेत्यांच्या यादीत ते ४२व्या क्रमांकावर आहेत. दिल्लीतील प्रदूषणावर मात करण्यासाठी केजरीवालांनी आणलेली 'सम-विषम' योजना त्यांची प्रतिमा उंचावण्यास कारणीभूत ठरली आहे. 'फॉर्च्युन'नं केजरीवाल यांच्या या योजनेचं कौतुक केलं आहे. 'केजरीवाल यांनी राजकीय जोखीम पत्करून ही योजना लागू केली. हे एक धाडसी पाऊल होते,' असं 'फॉर्च्यून'नं म्हटलं आहे.

अमेरिकेतील देशांतर्गत व जागतिक आव्हानांचा मुकाबला करण्यात अपयशी ठरलेले बराक ओबामा यांना सलग तिसऱ्या वर्षी यादीतून वगळण्यात आलं आहे. पंतप्रधान नरेंद्र मोदी यांना यादीतून वगळण्याचं कोणतंही कारण 'फॉर्च्युन'कडून देण्यात आलेलं नाही.

'फॉर्च्युन'च्या यादीत जाण्याचे निकष

> व्यवस्थेत बदल घडविणारा वा घडवू शकणारा एखादा निर्णय > यापूर्वी मिळविलेला लौकिक कायम राखण्यात यश > इतरांना प्रेरक ठरेल असं एखादं पाऊल