'फ्लिपकार्ट'च्या संस्थापकांविरोधात गुन्हा

मटा ऑनलाइन वृत्त । बेंगळुरू

'फ्लिपकार्ट'चे संस्थापक सचिन बन्सल आणि बिन्नी बन्सल अडचणीत सापडले आहेत. बेंगळुरूतील एका उद्योजकाची फसवणूक केल्याप्रकरणी बन्सल बंधूंसह कंपनीच्या तीन कर्मचाऱ्यांविरोधात गुन्हा दाखल करण्यात आला आहे.

इंदिरानगरातील सी-स्टोर कंपनीकडून फ्लिपकार्टला १२ हजार ५०० लॅपटॉप देण्यात आले होते. त्यांचे जवळपास ९.९६ कोटींचे बिल फ्लिपकार्टने दिले नाही. या प्रकरणी सी-स्टोरचे मालक नवीन कुमार यांनी बन्सल बंधूंसह कंपनीचे सेल्स डायरेक्टर हरी, अकाऊंट्स मॅनेजर सुमित आनंद आणि शर्राक यांच्याविरोधात पोलीस ठाण्यात तक्रार दाखल केली. 'सी-स्टोर कंपनीतर्फे फ्लिपकार्टला लॅपटॉप आणि इतर इलेक्ट्रॉनिक वस्तूंचा पुरवठा केला जातो. जून २०१५ ते जून २०१६ या कालावधीत कंपनीने फ्लिपकार्टला जवळपास १४ हजार लॅपटॉप दिले होते. त्यातील १४८२ लॅपटॉप त्यांनी परत केले. उर्वरित लॅपटॉपचे पैसे दिले नाहीत,' असे कुमार यांनी तक्रारीत म्हटले आहे.

थकबाकीबाबत फ्लिपकार्टला सांगितले असता, ३९०१ लॅपटॉप परत करण्यात आल्याचे त्यांनी सांगितले. फ्लिपकार्टने ९.९६ कोटी रुपयांची फसवणूक केली आहे, असा आरोपही कुमार यांनी केला आहे.