मंदिरात चेंगराचेंगरी चार ठार

कांचीपुरम : येथील अथिवररदार मंदिरात मिरवणुकीवेळी चार भाविकांचा मृत्यू झाला. त्यांची प्रकृती आधीच बिघडलेली असल्यामुळे ही दुर्घटना घडल्याचा दावा मुख्यमंत्री के. पलनीस्वामी यांनी केला आहे.

चेन्नईपासून ७० किलोमीटरवर कांचीपुरम असून, तेथील अथिवररदार मंदिरात दर ४० वर्षांतून एकदा अथि देवतेची मूर्ती पाण्याबाहेर काढली जाते. हा सोहळा पाहण्यासाठी भाविक गर्दी करतात. यंदा एक जुलैपासून हा सोहळा सुरू झाला आहे. त्यामुळे मंदिरात सध्या प्रचंड गर्दी होत आहे. या ठिकाणी चेंगराचेंगरी झालेली नाही, असे पोलिसांनी म्हटले आहे. मृत भाविकांपैकी दोन महिलांसह तिघांचे वय ५० हून अधिक होते. एक जण आंध्र प्रदेशातील २१ वर्षांचा तरुण आहे. मृतांच्या वारसांना तमिळनाडू सरकारने प्रत्येकी एक लाख रुपयांची तातडीची मदत जाहीर केली आहे. या मंदिरात गुरुवारी सुमारे १.७० लाख भाविक होते, अशी माहिती मुख्यमंत्र्यांनी विधानसभेत दिली. या ठिकाणच्या अव्यवस्थेमुळेच भाविकांचा बळी गेल्याची टीका विरोधी पक्षीय नेत्यांनी सभागृहात केली.