इंधन, धान्य निम्म्या किमतीत

टाइम्स वृत्त, श्रीनगर

लष्करी अधिकाऱ्यांकडून निम्म्या किमतीत इंधन व धान्य विकले जाते, अशी माहिती निमलष्करी दलाच्या व प्रामुख्याने सीमा सुरक्षा दलाच्या (बीएसएफ) चौक्यांनजीक राहणाऱ्या नागरिकांनी दिली आहे. काही ‘बीएसएफ’ जवानांनीसुद्धा याला दुजोरा दिला आहे.

‘बीएसएफ’ जवान तेज बहाद्दूर यादव याने सीमेवरील जवानांना निकृष्ट दर्जाचे अन्न दिले जात असल्याचा व्हिडीओ सोशल मीडियावर शेअर केल्याच्या पार्श्वभूमीवर यासंबंधी अनेक बाबी समोर येत आहेत. यासंदर्भात श्रीनगर विमानतळाजवळील हुमहम ‘बीएसएफ’ मुख्यालयाशेजारील दुकानदारांना जवानांसाठीचे धन्य व पेट्रोल, डिझेलसारखे इंधन अर्ध्या किमतीत विकले जात असल्याचे स्पष्ट झाले आहे. अधिकारी पेट्रोलसह तांदूळ आणि मसाल्यासारख्या वस्तू निम्म्या किमतीत देतात, असे येथील एका कंत्राटदाराने नाव नमूद न करण्याच्या अटीवर सांगितले. एका ‘बीएसएफ’ जवानाने या माहितीला दुजोरा दिला आहे.

वरिष्ठ अधिकारी डाळ आणि भाज्या चौकीबाहेरील नागरिकांना कमी किमतीत विकतात, असे या जवानाचे म्हणणे आहे.

दरम्यान, ‘बीएसएफ’च्या कार्यालयांसाठी लागणारे लाकडी सामान खरेदी करण्यासाठी ई-टेंडरिंग प्रक्रिया राबवली जात नाही. अधिकारी थेट अशा सामानाची खरेदी करतात व त्या बदल्यात दुकानदाराच्या नफ्याहून अधिक दलाली घेतात, असे एका फर्निचर व्यापाऱ्याने म्हटले आहे.

काही बाबी संशयास्पद

यादवच्या व्हिडीओनंतर याप्रकरणी उपमहासंचालक दर्जाच्या अधिकाऱ्यास अहवाल सादर करण्याचे आदेश केंद्रीय गृह मंत्रालयाने दिले होते. हा अहवाल सादर करण्यात आला असून, यात काही बाबी संशयास्पद असल्याचे केंद्रीय गृहराज्यमंत्री किरेन रिजीजू यांनी म्हटले आहे.

कुटुंबीयांचा पाठिंबा

यादवने घेतलेल्या भूमिकेबद्दल त्याच्या पत्नीसह मुलानेही त्याला पाठिंबा दिला आहे. तो काहीच चुकीचे करत नसून, सत्य समोर आणत आहे. तो केवळ चांगल्या अन्नाची मागणी करत आहे व यावरून त्याला मानसिक समस्या आहे, असे म्हणणे अयोग्य आहे, असे यादवच्या पत्नीने म्हटले आहे.

सेहवागचे ट्विट

क्रिकेटपटू वीरेंद्र सेहवाग याने ट्विटरद्वारे प्रतिक्रिया नोंदवली आहे. ‘सैनिक आणि शेतकऱ्यांची देखभाल करणे गरजेचे आहे. त्यांच्या खाण्याची योग्य व्यवस्था झाली पाहिजे.’ असे ट्विट त्याने केले आहे.