होय, मीच खून केला!; गँगस्टरची फेसबुक पोस्ट

मटा ऑनलाइन वृत्त । चंदीगड

अमृतसरमधील हिंदू संघर्ष सेनेच्या नेत्याची हत्या केल्याचा दावा एका कुख्यात गुंडाने फेसबुक पोस्टद्वारे केला आहे. या हत्येचा संबंध कोणत्याही धर्माशी संबंध जोडू नये, असेही त्याने म्हटले आहे.

अमृतसरमध्ये ३० ऑक्टोबरला हिंदू संघर्ष सेनेचे नेते विपीन शर्मा यांची हत्या झाली होती. ही हत्या आपणच केली, असा दावा फरारी गुंड सरज संधूने सोमवारी फेसबुक पोस्टद्वारे केला. 'संधूच्या फेसबुकवरील पोस्टबाबत माहिती मिळाली. ही पोस्ट दुसऱ्या व्यक्तीने केली असेल,' असे अमृतसरचे पोलीस उपायुक्त जगमोहन सिंह यांनी 'टाइम्स ऑफ इंडिया'ला सांगितले. पंजाबमधील गुंडांनी हत्येची जबाबदारी स्वीकारण्याची ही पहिलीच वेळ नाही. गेल्या वर्षीही एका कुख्यात गुंडाने फजिल्का विधानसभा मतदारसंघातून निवडणूक लढलेला नेता जसविंदर सिंह रॉकी यांच्या हत्येची जबाबदारी स्वीकारली होती.