गौरी यांच्या मारेकऱ्यांची माहिती देणाऱ्यास १० लाख

मटा ऑनलाइन वृत्त । बेंगळुरू

ज्येष्ठ पत्रकार गौरी लंकेश यांच्या हत्येला चार दिवस झाले तरी अद्याप कोणतेच धागेदोरे लागलेले नसताना कर्नाटक सरकारने मारेकऱ्यांची माहिती देणाऱ्यास आज दहा लाखांचे इनाम जाहीर केले. कर्नाटकचे गृहमंत्री रामलिंग रेड्डी यांनी याबाबत घोषणा केली.

गौरी लंकेश यांच्या हत्येचा तपास वेगाने करण्याचे तसेच हल्लेखोरांना लवकरात लवकर अटक करण्याचे निर्देश मुख्यमंत्र्यांनी दिले असून त्यानुसार पावले उचलली जात आहेत, असे रेड्डी यांनी सांगितले.

दरम्यान, पोलिसांनी बुधवारीच गौरी लंकेश यांच्या हत्येबाबत माहिती देण्याचे आवाहन करत त्यासाठी फोन नंबर आणि ई-मेल आयडी जारी केला होता. मुख्यमंत्री सिद्धरामय्या यांनी आज एसआयटीसोबत बैठक घेऊन तपासाची सद्यस्थिती जाणून घेतली व तपासाबाबत निर्देश दिले. त्यानंतरच आरोपींची माहिती देणाऱ्यास १० लाखाचे इनाम दिले जाईल, अशी घोषणा कर्नाटक सरकारकडून करण्यात आली.