भूगर्भशास्त्रज्ञांनी शोधला सागरी खजिना

मटा ऑनलाइन वृत्त । कोलकाता

समुद्राच्या पोटात प्रचंड खजिना दडल्याचं आपण कथा-दंतकथांमधून ऐकत आलो आहोत. हा खजिना मिळावा म्हणून अनेकांनी प्रयत्नही करून पाहिले. पण त्यांना यश आले नाही. हा खजिना शोधण्याची करामत मात्र भारतीय भूगर्भशास्त्रज्ञांनी करून दाखवली आहे. या शास्त्रज्ञांनी समुद्राच्या पोटात असलेल्या लाखो टन किंमती धातू आणि खनिजांचा शोध लावला आहे.

२०१४ मध्ये पहिल्यांदा मंगळुरू, चेन्नई, मन्नार बसीन, अंदमान-निकोबार आणि लक्षद्वीपच्या आसपास समुद्रात हा अमुल्य ठेवा असल्याचा शोध लागला होता. त्यानंतर शास्त्रज्ञांनी शोध सुरूच ठेवत हा खजिना शोधून काढला. हा शोध घेत असताना लाइम मड, फॉस्फेट-रिच आणि हायड्रो कार्बन्स आदी मौल्यवान गोष्टी शास्त्रज्ञांना सापडल्या आहेत. त्यामुळे समुद्राच्या पोटातील आणखी खजिना शोधण्यास शास्त्रज्ञांना यश मिळेल असं सांगण्यात येतं. ३ वर्षाच्या अथक प्रयत्नानंतर जिओलॉजिकल सर्व्हे ऑफ इंडियाने १८१,०२५ वर्ग किलो मीटरचा हाय रिझॉल्यूशन सीबेड मोर्फोलॉजिकल डाटा तयार केला असून त्यानुसार समुद्रात १० हजार मिलियन टन लाइम मड असल्याचं सांगण्यात येतं.


हा खजिना बाहेर काढण्यासाठी समुद्र रत्नाकर, समुद्र कौस्तूभ आणि समुद्र सौदीकामा या अत्याधुनिक जहाजांचा उपयोग केला जात आहे. मिनरल वॉटर मिळणाऱ्या ठिकाणांचा शोध घेणे आणि मिनरल वॉटरच्या स्त्रोतांचा अभ्यास करणे हाही त्यामागचा हेतू असल्याचं जीएसआयचे अधिक्षक आशिष नाथ यांनी सांगितलं.