जागावाटपात मतदारसंघ 'लोकजनशक्ती'कडे
वृत्तसंस्था, पाटणा
बिहारमधील नवादा या सध्याच्या मतदारसंघातून तिकीट न मिळाल्याने भारतीय जनता पक्षाचे नेते आणि केंद्रीय मंत्री गिरीराजसिंह नाराज झाले आहेत. लोकसभेसाठी बिहारमध्ये भाजपची संयुक्त जनता दल आणि लोकजनशक्ती पक्ष यांच्याशी युती झाली असून, जागावाटपात नवादा मतदारसंघ लोकजनशक्ती पक्षाच्या पदरात पडला आहे. गिरीराजसिंह यांना बेगुसराय मतदारसंघातून लढण्याची विनंती पक्षाकडून करण्यात आली आहे.
'जागावाटपामुळे येणारी बंधने समजण्यासारखी आहेत; पण बिहारमधील अन्य कोणत्याही केंद्रीय मंत्र्याला त्याचा सध्याचा मतदारसंघ नाकारण्यात आलेला नाही. माझ्या मतदारसंघाच्या बांधणीसाठी मी परिश्रम केलेले असतानाही हे घडले आहे,' अशी नाराजी गिरीराजसिंह यांनी व्यक्त केली.
भाजपप्रणित एनडीए आघाडीने रविवारी बिहारमधील भाजप, संयुक्त जनता दल आणि लोकजनशक्ती पक्ष आघाडीच्या उमेदवारांची यादी जाहीर केली. यानुसार भाजप व जेडीयू प्रत्येकी १७, तर लोकजनशक्ती पक्ष सहा जागा लढवणार आहे.