८० टक्के दृष्टी गमावूनही IIM ची दारे उघडली

मटा ऑनलाइन वृत्त । अहमदाबाद

तिच्या नजरेने तिला दगा दिला आहे, पण तिच्या ध्येयावरची तिची नजर मात्र ठाम आहे. दृष्टी ८० टक्के अधू असूनही प्राची सुखवानी (२१) हिला तिच्या गुणवत्तेनुसार इंडियन इन्स्टिट्यूट ऑफ मॅनेजमेंट, अहमदाबादमध्ये प्रवेश मिळाला. तिला स्वत:चा स्टार्टअप उद्योग सुरू करायचा आहे आणि भविष्यात अंधांसाठी स्वयंसेवी संस्था सुरू करायची आहे.

प्राची सध्या महाराज सयाजीराव विद्यापीठाच्या वाणिज्य शाखेत बॅचलर ऑफ बिझनेस अॅडमिनिस्ट्रेशनच्या शेवटच्या वर्षाला आहे. तिसऱ्या इयत्तेत असल्यापासून मॅक्युलर डिस्ट्रॉफी या जनुकीय आजारामुळे तिची दृष्टी अधू होत गेली. या आजारावर कोणताही उपचार उपलब्ध नाही. पण प्राचीच्या महत्त्वाकांक्षेच्या आड तिने या आजाराला येऊ दिले नाही. कॅट २०१६ मध्ये तिला ९८.५५ टक्के गुण मिळाले. 'मला नजीकच्या भविष्यात मल्टीनॅशनल कंपनीत काम करायचे आहे. तिथला अनुभव घेऊन स्वत:चा स्टार्ट अप उद्योग सुरू करायचा आहे. भविष्यात मला अंधांसाठी स्वयंसेवी संस्था सुरू करायची आहे,' असे प्राची सांगते.

प्राचीच्या वडीलांचा सुरेश सुखवानी यांचा कपड्याचा व्यवसाय आहे. तिला तिच्या डोळ्यांवर उपचार करण्यासाठी १५ वर्षे सलग चेन्नईला नेण्यात येत होते, तेथील डॉक्टरांनी तिला वाचण्यासाठी विशिष्ट चष्मा लावण्याचा सल्ला दिला होता. पण ती इतकी अभ्यासू होती की तिला तो चष्मादेखील एक अडथळा वाटे, असे तिचे वडील सांगतात. तिला अहमदाबाद, बंगळुरू आणि कोलकाता या तिन्ही ठिकाणच्या आयआयएम्समधून मुलाखतीसाठी बोलावणे आले. प्राचीची आई कांचन गृहिणी आणि एलआयसी एजंट आहे. मोठी बहिण निशिता मुंबईच्या एका खासगी महाविद्यालयातून एमबीए करत आहे.

सोमवारी प्राची तिचा BBA चा शेवटचा पेपर लिहिण्यात व्यग्र होती आणि तिच्यावर सोशल मिडीयातून अभिनंदनाचा वर्षाव होत होता. सर्व अडथळे पार करत BBA पूर्ण केल्याबद्दल विद्यापीठीने तिची विशेष दखल घेतली होती. 'प्राचीचे यश प्रत्येकाला प्रेरणा देणारे आहे,' असे विद्यापीठाचे वाणिज्य विभागाचे अधिष्ठाता शरद बन्सल म्हणाले.