गोव्यात महाराष्ट्राची पुनरावृत्ती? विमान सज्ज, आमदार 'उडायच्या' तयारीत; पण अचानक...

पणजी: महाराष्ट्रात सत्तांतर झाल्यानंतर आता गोव्यात राजकीय घडामोडींना वेग आला आहे. काँग्रेसचे निम्मे आमदार बंडखोरीच्या पवित्र्यात आहेत. हे आमदार भाजपमध्ये प्रवेश करण्याची शक्यता आहे. काँग्रेस नेतृत्त्वाला याची कुणकुण लागताच पक्षाचे आमदार मायकल लोबो यांची विरोधी पक्षनेतेपदावरून हकालपट्टी करण्यात आली. माजी मुख्यमंत्री दिगंबर कामत यांच्याविरोधातही कारवाई होण्याची शक्यता आहे.

गोवा काँग्रेसमधील बंड अद्याप शमलेलं नाही. काँग्रेसच्या आमदारांना नेण्यासाठी चार्टर्ड प्लेन तयार ठेवण्यात आलं होतं. काल संध्याकाळी ४ वाजता त्यांना कोल्हापूर एअरफिल्डवरून नेण्याची तयारी करण्यात आली होती, असा आरोप काँग्रेसकडून करण्यात आला आहे. आमदारांना नेण्यासाठी एक चार्टर्ड प्लेन तयार ठेवण्यात आल्याची माहिती आम्हाला मिळाली होती, असं जीपीसीसीचे अध्यक्ष अमित पाटकर यांनी सांगितलं.
'सध्या माझ्याकडे ...', उद्धव ठाकरेंचे पुण्यातील कार्यकर्त्यांना भावुक आवाहन
चार्टर्ड विमानाच्या उड्डाणाला परवानगी मिळाली होती. विमान महाराष्ट्रातून झेपावणार होतं. काल संध्याकाळी ४-४.३० च्या सुमारास विमान उड्डाण करणार होतं. मात्र ऐनवेळी काँग्रेसच्या काही निष्ठावंत आमदारांनी आम्हाला याची माहिती दिली. आपल्यासोबत ८ आमदार येणं अशक्य असल्याची कल्पना बंडखोर आमदारांना आली. त्यामुळे त्यांची योजना अपयशी ठरली, असं पाटकर म्हणाले.

भाजपनं मात्र काँग्रसचे आरोप फेटाळून लावले आहेत. काँग्रेसनं आपले आमदार सांभाळायला हवेत, असा खोचक सल्ला भाजपचे प्रदेशाध्यक्ष सदानंद तनावडे यांनी दिला. मला भाजपसोबत यायचं आहे, असं काँग्रेसच्या कोणत्याही आमदारानं मला सांगितलेलं नाही. गोव्यात आमचं सरकार आहे. सरकारकडे पूर्ण बहुमत आहे. मग आम्हाला कशाला आणखी आमदारांची गरज भासेल, असा सवाल त्यांनी उपस्थित केला.
भाजप आणि एकनाथ भाईंशी जुळवून घ्या, सेना खासदारांची उद्धव ठाकरे यांच्याकडे मागणी : संजय राऊत
गोवा काँग्रेसमध्ये सारं काही आलबेल नसल्याचे संकेत काही दिवसांपूर्वीच मिळाले होते. शनिवारी काँग्रेसच्या आमदारांची बैठक होती. अर्थसंकल्पीय अधिवेशनापूर्वी काही मुद्द्यांवर चर्चा करण्याच्या हेतूनं बैठक बोलावण्यात आली होती. त्या बैठकीला एकूण ११ आमदारांपैकी ७ जण उपस्थित होते. दिगंबर कामतदेखील बैठकीला उपस्थित होते. पक्षात ऑल वेल नसल्याची कुजबुज तेव्हापासून सुरू झाली होती. रविवारी रात्री उशिरा मुख्यमंत्री प्रमोद सावंत आणि मायकेल लोबो यांची बैठक झाली. सविस्तर चर्चा झाली. मात्र सावंत यांनी यावर भाष्य करणं टाळलं.