Manohar Parrikar : पर्रीकरांचं पार्थिव ठेवलेल्या जागेचं शुद्धीकरण?

पणजी

गोव्याचे माजी मुख्यमंत्री आणि माजी केंद्रीय मंत्री दिवंगत मनोहर पर्रीकर यांचे पार्थिव ठेवण्यात आलेल्या कला अकादमीचे शुद्धीकरण करण्यात आल्याचा आरोप सामाजिक कार्यकर्त्या मनस्विनी प्रभुणे यांनी केला आहे. सोशल मीडियावर पोस्ट करून त्यांनी हा आरोप केला आहे. याप्रकरणी चौकशीचे आदेश सांस्कृतिक खात्याचे मंत्री गोविंद गावडे यांनी दिले आहेत.

मनोहर पर्रीकर यांच्या पार्थिवानंतर शुद्धीकरण करण्यात आल्याचे फोटो आणि व्हिडिओ मनस्विनी यांनी सोशल मीडियावर शेअर केले आहेत. त्यांच्या फेसबुक पोस्टनंतर अकादमीमधील कथित प्रकारावर सोशल मीडियावर संताप व्यक्त करण्यात येत आहे. मनोहर पर्रीकर यांचं मागच्या आठवड़्यात निधन झाले होते. निधनानंतर त्यांचे पार्थिव गोव्यातील कला अकादमीमध्ये ठेवण्यात आले होते. त्यांच्या पार्थिवामुळे संपूर्ण अकादमीचे शुद्धीकरण करण्यात येत होते. सरकारी वास्तूंचे शुद्धीकरण करायला लागले तर कसे होईल. सरकारी वास्तूमध्ये असे कार्यक्रम करायला नको. सरकारी वास्तूचे शुद्धीकरण केले तर मग मिरामार बीचचे पण शुद्धीकरण करणार का?, चुकीचे पायंडे कशाला पाडायचे?, असा सवाल त्यांनी सोशल मीडियावरून विचारला आहे. दरम्यान, कला अकादमीत होमहवन यासारखे प्रकार घडणे चुकीचे आहे. सरकारी निवासस्थानी अवैज्ञानिक गोष्टींना खतपाणी घालणे चुकीचे आहे, असे सांगत याप्रकरणाच्या चौकशीचे आदेश देण्यात आल्याची माहिती कला व सांस्कृतिक खात्याचे मंत्री गोविंद गावडे यांनी दिली आहे.