गुरेविक्री बंदीला गोव्याचा विरोध​

वृत्तसंस्था, पणजी

‘केंद्र सरकारने अधिसूचना काढून बाजारात पशुंची खरेदी वा विक्री करण्यास बंदी आणली आहे. या निर्णयामुळे गोव्यातील नागरिकांमध्ये धास्ती असून, मुख्यमंत्री मनोहर पर्रीकर हे केंद्र सरकारला याबाबत पत्र लिहिणार आहेत,’ अशी माहिती गोव्याचे कृषिमंत्री विजय सरदेसाई यांनी दिली.

‘केंद्र सरकारने अधिसूचना काढून बाजारातून पशुंची खरेदी वा विक्री व्यवहारावर बंदी आणली आहे. स्थानिक नागरिकांनी सरकारच्या या निर्णयाची धास्ती घेतली आहे. गोव्यात काही भागांत बीफचे सेवन केले जात असून, सरकार सर्वांना शाकाहारी बनवत आहे की काय?, अशी भीती त्यांना वाटत आहे. त्याबाबत मुख्यमंत्री मनोहर पर्रीकर यांच्याशी चर्चा झाली असून, राज्य सरकारच्या काही हरकती व सूचनांबाबत ते केंद्र सरकारला पत्र लिहिणार आहेत,’ असे सरदेसाई यांनी सांगितले.