First Indian PM: गुगलवर नेहरूंऐवजी मोदी

नवी दिल्ली: स्वतंत्र भारताचे पहिले पंतप्रधान पंडित जवाहरलाल नेहरू असल्याचं आपणा सर्वांना माहित आहे. मात्र 'भारताचे पहिले पंतप्रधान कोण?' असं गुगलवर सर्च केल्यास पंतप्रधान नरेंद्र मोदी यांचा फोटो दिसून आला. त्यामुळे अनेकजण चक्रावून गेले आहेत.

'भारताचे पहिले पंतप्रधान' असं गुगलवर टाइप केल्यानंतर जवाहरलाल नेहरू यांचं नाव दिसून येतं. विकिपीडियाची लिंकही दिसते. मात्र ही लिंक ओपन करताच माहिती नेहरूंची आणि फोटो मात्र मोदींचा असा विचित्र प्रकार पाह्यला मिळाला. याच लिंकमध्ये आजवरच्या पंतप्रधानांची यादी देण्यात आली आहे. बुधवारी दिवसभर हा प्रकार दिसत होता. त्यामुळे गुगलची ही चूक लगेचच सोशल मीडियावर व्हायरल झाली. त्यावर नेटकऱ्यांनी प्रतिक्रियाही द्यायला सुरुवात केली. काहींनी तर स्क्रिन शॉटही पोस्ट केले. बऱ्याच जणांनी या चुकीला गुगललाच दोषी ठरवलं. दरम्यान, गुगलने ही चूक दुरुस्त केली असून आज सकाळपासून साइटवर नेहरुंचाच फोटो दिसत आहे. यापूर्वीही असे प्रकार समोर आले आहेत, असं ट्विट काँग्रेसच्या सोशल मीडियाच्या संयोजक राम्यानं केलं आहे.