बँकेचे खाते उघडण्यासाठीही आधार कार्ड गरजेचे

मटा ऑनलाइन वृत्त। नवी दिल्ली

केंद्र सरकारने आधार कार्डबाबत मोठा निर्णय घेत बँकेत खातं उघडण्यासाठी आता आधार कार्ड बंधनकारक केले आहे. याबरोबरच, ५० हजार रुपये किंवा त्यापेक्षा अधिक रकमेच्या व्यवहारासाठी आधार क्रमांक देणंही अनिवार्य करण्यात आलं आहे. बँकांच्या खातेधारकांना ३१ डिसेंबरपर्यंत आधार कार्ड जमा करण्याच्या सूचनाही देण्यात आल्या आहेत. असं केलं गेलं नाही, तर मग आपलं बँक खातं अवैध होणार आहे.

राजस्व विभागाने काढलेल्या अधिसूचनेनुसार, आधार क्रमांक प्राप्त करण्यास पात्र असलेल्या व्यक्तीला पॅन क्रमांक हवा असल्यास त्याला ३१ डिसेंबरपर्यंत आधार क्रमांक किंवा आधारसाठी अर्ज द्यावा लागणार आहे. निर्धारित तारखेपर्यंत आधार क्रमांक दिला नाही, तर त्या व्यक्तीचे खाते निष्क्रिय होणार आहे. पुढे त्या व्यक्तीने आधार क्रमांक दाखल केल्यानंतरच त्याचे खाते सुरू केले जाणार आहे. बेकायदेशीर सावकारी रोखण्याच्या उद्देशानेच सरकारने हा निर्णय घेतला असल्याचे अधिसूचनेत म्हटले गेले आहे.

१ जुलैपासून आयकर परतावा भरण्यासाठी आधार कार्ड क्रमांक गरजेचा असल्याचे केंद्रीय प्रत्यक्ष कर बोर्डाने यापूर्वीच स्पष्ट केले आहे. या व्यतिरिक्त, नवे पॅन कार्ड मिळवण्यासाठी देखील आधार क्रमांकाची गरजेचा असणार आहे. सुप्रीम कोर्टाने दिलेल्या निर्णयानुसार केवळ ज्यांच्याकडे आधार कार्ड किंवा पंजीकृत ओळखपत्र नाही अशाच लोकांना काहीअंशी दिलासा दिला असल्याचे आयकर विभागाने स्पष्ट केले होते.