साबरमती तुरुंगात कैद्यांसाठी 'आयटीआय'

मटा ऑनलाइन वृत्त । अहमदाबाद

साबरमती तुरुंगात कैद्यांसाठी औद्योगिक प्रशिक्षण संस्था (आयटीआय) सुरू करण्यात येणार आहे. यासंदर्भातील प्रस्तावाला राज्य सरकारच्या गृहविभागाने परवानगी दिली आहे. त्यानुसार शिक्षक आणि इतर कर्मचाऱ्यांची भरती तुरुंग अधिकाऱ्यांमार्फत केली जाणार आहे. त्यानंतर प्रवेशप्रक्रिया सुरू होणार आहे.

आतापर्यंत तुरुंगात विविध प्रशिक्षण शिबिर घेतले आहेत. पण कैद्यांसाठी आयटीआय सुरू करण्याची ही पहिलीच वेळ आहे. अभ्यासक्रम पूर्ण करणाऱ्या कैद्यांना प्रमाणपत्र दिले जातील, अशी माहिती तुरुंग अधीक्षक सुनील जोशी यांनी दिली. पहिल्या टप्प्यात कैद्यांना विविध आठ अभ्यासक्रमांसाठी प्रवेश दिला जाईल. त्यात वायरमन, मोबाइल दुरुस्ती, प्लम्बिंग आदींचा समावेश आहे, असेही त्यांनी सांगितले.

आयटीआयमध्ये प्रवेश घेऊ इच्छिणाऱ्या कैद्यांकडून अर्ज भरून घेतले जातील. त्यानंतर विविध अभ्यासक्रमांसाठी त्यांची निवड केली जाईल. सकाळपासून वर्ग सुरू होतील. प्रथम थिअरी होईल. त्यानंतर प्रात्यक्षिक असेल. महिनाभरात संस्था सुरु होणार आहे, असेही त्यांनी सांगितले.