सावधान! चिनी फोन चोरताहेत खासगी माहिती

टाइम्स न्यूज नेटवर्क । नवी दिल्ली

केंद्र सरकारने स्मार्टफोन बनवणाऱ्या चिनी कंपन्यांना नोटीस बजावली आहे. या चिनी कंपन्या स्मार्टफोन्सच्या माध्यमातून भारतीय ग्राहकांची खासगी माहिती चोरत असल्याचा सरकारला संशय आहे. यासंदर्भात ओप्पो, व्हीव्हो, शाओमी आणि जियोनी या चिनी कंपन्यांकडून सरकारने स्पष्टीकरण मागितले आहे. डोकलाममधील भारत आणि चीनच्या वादाला जोडून सरकारच्या या नोटीसकडे बघितले जात आहे.

स्मार्टफोन बनवणाऱ्या बहुतेक कंपन्या या चीनमधील आहेत. यामुळे देशातील ग्राहकांची खासगी माहिती हॅक होण्याची भीती सरकारला आहे. स्मार्टफोनमधील कॉन्टॅक्ट लिस्ट आणि मॅसेजेसमधील वैयक्तिक माहिती चोरली जात असल्याचा सरकारला संशय आहे. पण फक्त चिनी कंपन्यांनाच सरकारने नोटीस बजावलेली नाही. तर अॅपल, सॅमसंग आणि भारतातील मायक्रोमॅक्ससह एकूण २१ कंपन्यांना इलेक्ट्रॉनिक्स आणि माहिती तंत्रज्ञान मंत्रालयाने नोटीस दिली आहे.

सुरक्षा नियमांचे पालन करण्यासाठी कंपन्यांना २८ ऑगस्टपर्यंतची मुदत देण्यात आली आहे. तसंच कंपन्या खरचं सुरक्षा नियमांचे पालन करतात की नाही? यासाठी संबंधित कंपन्यांचे ऑडिटही केले जाऊ शकते. यात कंपनी दोषी आढळल्यास तिच्यावर कारवाई होईल आणि दंड बजावला जाईल, अशी माहिती 'टाइम्स ऑफ इंडिया'ला अधिकृत सूत्रांनी दिली.

इलेक्ट्रॉनिक्स आणि इन्फॉर्मेशन उत्पादनांचं चीनमधून मोठ्या प्रमाणात आयात होत असल्याचं वृत्त यापूर्वी देण्यात आलं होतं. यामुळे सुरक्षा आणि डेटा लीक होण्याच्या चिंतेने सरकारने याप्रकरणी आधीच समीक्षा सुरू केली होती. गेल्या दोन महिन्यांपासून डोकलाममध्ये भारत-चीनमध्ये तणाव आहे. अशावेळी सरकारने हे पाऊल उचलल्याने त्याला अधिक महत्त्व आलं आहे.