बँक खाते उघडण्यासाठी 'आधार'ची गरज नाही?

नवी दिल्ली

मोबाईल नंबर, बँक खाते, शाळेतील प्रवेशासाठी आधार सक्ती करता येणार नाही, असा महत्वपूर्ण निकाल सुप्रीम कोर्टाने दिल्यानंतर केंद्र सरकार आणि रिझर्व्ह बँक ऑफ इंडिया खडबडून जागे झाले आहेत. आधार सक्तीऐवजी क्यूआर कोड (QR code) च्या आधारावर ऑफलाइन आधारचा वापर करण्याचा विचार सध्या केंद्र सरकारकडून केला जात आहे.

सरकार आणि आरबीआय यांच्यात ऑफलाइन आधारचा वापर करण्यासाठी सध्या चर्चा सुरू आहे. जर याचा वापर करण्याचं ठरलं तर बँक खाते उघडण्यासाठी, पेमेंट वॉलेट हाताळण्यासाठी आणि विमा मिळवण्यासाठी बायोमॅट्रिक eKYC ऐवजी ऑफलाइन आधारचा वापर करण्यात येऊ शकणार आहे. आधार कार्डच्या वैधतेवर निर्णय देताना सुप्रीम कोर्टाने मोबाईल नंबर, बँक खाते, शाळेतील प्रवेश, पॅन कार्ड काढणे यासाठी आधारची सक्ती करता येणार नाही, असा महत्वपूर्ण निर्णय दिला होता. सुप्रीम कोर्टाच्या या निर्णयानंतर ऑफलाइन आधारची चर्चा सुरू झाली. ऑफलाइन आधारचे Unique Identification Authority of India च्या सर्व्हरांसोबत कोणतीही लिंक राहणार नाही. क्यूआर कोडसारख्या प्रिंट आउटला UIDAI कडून डिजिटली स्वाक्षरी केली जाईल. त्यानंतर ऑफलाइन आधारला रेशन कार्ड, ड्रायव्हिंग लायसन्स, मतदान ओळखपत्राइतकेच महत्व राहिल. तसेच पासपोर्ट आणि बँक खाते उघडण्यासाठी याचा फायदा होईल.

ऑफलाइन आधार हे KYC चे नवे रुप असणार आहे. यात व्यक्तीचं नाव, फोटो आणि पत्ता दिसणार असून उर्वरित माहिती गुप्त ठेवण्यात येणार आहे. नागरिकांची माहिती गुप्त ठेवण्यासाठी ऑफलाइन आधारचा वापर करता येऊ शकेल, असे UIDAI च्या एका अधिकाऱ्याने सांगितले.

ही बातमी इंग्रजीमध्ये वाचा