'त्याला' एड्स झाल्याचं कळलं; मुलीनं लग्न मोडलं

मटा ऑनलाइन वृत्त । तिरुवन्नामलई

तरुण आणि तरुणीचं लग्न ठरलं. दोघांच्याही घरी उत्साहाचं वातावरण होतं. तरुणाच्या कुटुंबीयांनी तर गल्लीबोळात लग्नाचे बॅनरसुद्धा लावले. 'लग्नघटीका समीप' आली असतानाच, तरुणाला एड्स झाल्याचं वधूसह तिच्या कुटुंबीयांना कळलं आणि त्यांनी ठरलेलं लग्न मोडलं.

तामिळनाडूतील तिरुवन्नामलईमध्ये ही घटना घडली आहे. परिसरातील 'शुभविवाहा'चे बॅनर पाहून कुणीतरी जिल्हाधिकाऱ्यांना फोन लावला आणि संबंधित तरुणाला एड्स झाल्याची माहिती दिली. त्यांनी तातडीनं पोलीस अधीक्षक आणि आरोग्य विभागाच्या सहायक संचालकांना फोन करून तरुणाविषयीच्या माहितीची खातरजमा करून घेतली. त्यानंतर मुलीच्या कुटुंबीयांचा शोध घेऊन त्यांना याबाबत कळवण्याचे आदेश अधिकाऱ्यांना दिले.

याबाबत तहसीलदारांनी सांगितलं की, "अधिकाऱयांनी कागदपत्रांची तपासणी केली. त्यावरून त्या तरुणाला एड्सची लागण झाल्याचे स्पष्ट होतं. ३० जुलै २०१४ पासून त्याच्यावर वैद्यकीय उपचार सुरु आहेत. वैद्यकीय अहवालावर दिलेल्या तरुणाच्या फोन नंबरवर संपर्क साधला. त्यावेळी एका तासात य़ेऊन भेटतो, असं त्यानं सांगितलं. पण तो आलाच नाही. याचदरम्यान, तरुणानं मुलीच्या कुटुंबीयांना फोन करून हे लग्न मोडण्याचा विरोधकांचा प्रयत्न आहे, असं सांगितलं होतं. अखेर आम्ही विवाहस्थळी जाण्याचा निर्णय घेतला. तेथे पोहोचल्यानंतर तरुणाविषयी वधूच्या कुटुंबीयांना माहिती दिली. मुलीनं त्या तरुणासोबत लग्न करण्यास नकार दिला." दरम्यान, मुलीच्या कुटुंबीयांनी घरी परतताना पोलीस बंदोबस्ताची मागणी केली आहे.