‘आधार कार्ड’ची व्याप्ती वाढविणार

Aman.Sharma@timesgroup.com

नवी दिल्ली (ईटी वृत्त) : शेअर बाजारातील ट्रे‌डिंगसाठी डीमॅट अकाउंट उघडणारे, छोटे उद्योजक आणि स्वयंसेवी संस्था यांनाही भविष्यात ‘आधार कार्ड’ सक्तीचे असणार आहे. युनिक आयडेंटिफिकेशन अॅथॉरिटी ऑफ इंडिया (यूआयडीएआय) आगामी काळात आधार कार्ड २० क्षेत्रांत अनिवार्य करणार आहे.

‘पीएमओ’ने सप्टेंबर २०१६ ते मार्च २०१७ पर्यंत देशातील सर्व व्यक्तींना ‘आधार कार्ड’ देण्याचे उद्दिष्ट ठेवले आहे. १२८ कोटी भारतीयांना आधार कार्ड देण्यासाठी सरकारने पावले उचलली आहेत. सध्याच्या काळात फक्त सहा व्यवहारांसाठी ‘आधार कार्ड’ अनिवार्य असते. मात्र, आगामी काळात आणखी २० क्षेत्रांत आधार कार्ड सक्तीचे केले जाणार आहे. माध्यान्ह भोजन योजना, सर्व शिक्षा अभियान आणि इतर काही लहान मुलांसाठीच्या योजनाही ‘आधार’मार्फत राबविण्याचा सरकारचा विचार आहे.

शेअर ट्रेडिंगसाठी डीमॅट अकाउंट उघडणारी व्यक्ती, प्रॉपर्टी रजिस्ट्रेशन, व्हेइकल रजिस्ट्रेशन आदी गोष्टीही ‘आधार’शी जोडण्यात येणार आहेत. ईपीएफओ आणि पासपोर्टसाठीही आधार बंधनकारक करणार असल्याचे वरिष्ठ सूत्रांनी सांगितले.

केंद्र सरकारच्या सांख्यिकी विभागाने दिलेल्या माहितीनुसार, देशभरातील ९६ टक्के जनतेकडे आधार कार्ड आहे. येत्या काळात ही टक्केवारी वाढविण्याचे सरकारचे उद्दिष्ट आहे. जीवन, आरोग्य आणि अपघात विम्यासाठीही ‘आधार कार्ड’ सक्तीचे असणार आहे. यापुढे जाऊन एखादी स्वयंसेवी संस्था सुरू करण्यासाठी ‘आधार कार्ड’ सक्तीचे राहील.