वृत्तसंस्था, वॉशिंग्टन
अमेरिकेची मध्यवर्ती बँक असलेल्या फेडरल रिझर्व्हने अल्पमुदतीच्या कर्जदरांमध्ये वाढ केली आहे. चालू आर्थिक वर्षात फेडरलने केलेली ही चौथी दरवाढ आहे. अशा प्रकारे मध्यवर्ती बँकेने कर्जे महाग करू नयेत, यासाठी अमेरिकेचे अध्यक्ष डोनाल्ड ट्रम्प यांनी बँकेवर दबाव आणण्याचा पुरेपूर प्रयत्न केला होता.
या पार्श्वभूमीवर, फेडरल रिझर्व्हचे अध्यक्ष जेरोम पॉवेल यांनी अमेरिकी अर्थव्यवस्था चालू आर्थिक वर्षात सातत्याने मजबूत होत आहे. अपेक्षेनुसार अर्थव्यवस्थेची वाटचाल सुरू आहे. बँकेने कर्जे महाग केल्यानंतर लगेचच त्याचे परिणाम वॉल स्ट्रीटवर दिसून आले. वॉल स्ट्रीटवरील समभाग मोठ्या प्रमाणावर कोसळले. कर्जदरात वाढ केल्यानंतर पॉवेल यांनी ट्विट करून सांगितले की, ट्रम्प यांचे ट्विट व निवेदने यांना फेडरलच्या धोरण प्रक्रियेत काहीही स्थान नाही.