जीएसटी : ६६ उत्पादनांवरील करात कपात

मटा ऑनलाइन वृत्त । नवी दिल्ली

जीएसटी परिषदेने अनेक उत्पादनांवरील करांचा फेरआढावा घेण्याचे ठरवले आहे. विविध प्रकारच्या ६६ उत्पादनांवरील जीएसटी दरात कपात करण्यात आली आहे. विशेषत: शेतीसाठी लागणाऱ्या ट्रॅक्टरच्या सुट्या भागांवरील कर २८ टक्क्यांवरून १८ टक्क्यांवर आणण्यात आला आहे. केंद्रीय अर्थमंत्री अरुण जेटली यांनी पत्रकार परिषदेत ही माहिती दिली.

संगणक प्रिंटरवर २८ टक्क्यांऐवजी आता १८ टक्के कर लागणार आहे. काजूवरचा कर १८ वरून १२ टक्के करण्यात आला आहे. १०० रुपयांवरील सर्व सिनेमा तिकिटांवर २८ टक्के तर १०० रुपयांखालील तिकिटांवर १८ टक्के कर लागणार आहे. याव्यतिरिक्त टेलिकॉम क्षेत्रावरील १८ टक्के कर कायम राहणार आहे. कटलरीवरील कर १८ टक्क्यांवरून कमी करून १२ टक्के करण्यात आला आहे. इन्सुलिनवरील GST १२ टक्क्यांवरून ५ टक्के, स्कूलबॅगवरील GST २८ टक्क्यांवरून १८ टक्के करण्याचा निर्णय घेण्यात आला आहे. अगरबत्ती उत्पादकांनाही दिलासा मिळाला आहे. अगरबत्तीवरील कर १२ टक्क्यांवरून ५ टक्के करण्यात आला आहे.

सॅनिटरी नॅपकिन्सवरील करात कपात करण्याची मागणी देशभरातून केली जात होती, मात्र त्यात कपात करण्यात आलेली नाही. एकूण १३३ उत्पादनांवरील कराचा फेरआढावा घेण्याच्या शिफारशी परिषदेला प्राप्त झाल्या होत्या. त्याचा अभ्यास करून ६६ उत्पादनांवरील करात कपात करण्यात आली. GST काऊन्सिलची पुढील बैठक पुढील रविवारी सकाळी ११.३० वाजता होणार आहे.