गुजरात विधानसभेचा बिगूल वाजला

मटा ऑनलाइन वृत्त । नवी दिल्ली

संपूर्ण देशाचे लक्ष लागून राहिलेल्या गुजरात विधानसभा निवडणुकांच्या तारखा अखेर जाहीर झाल्या आहेत. गुजरात विधानसभेसाठी दोन टप्प्यात मतदान होणार आहे. पहिल्या टप्प्यासाठी येत्या ९ आणि दुसऱ्या टप्प्यासाठी १४ डिसेंबर रोजी मतदान होणार असून १८ डिसेंबर रोजी मतमोजणी करण्यात येणार असल्याची घोषणा मुख्य निवडणूक आयुक्त अचलकुमार ज्योती यांनी केली. निवडणुकीचा कार्यक्रम जाहीर झाल्याने आजपासूनच गुजरातमध्ये आचारसंहिता लागू करण्यात येत असल्याचंही त्यांनी सांगितलं.

मुख्य निवडणूक आयुक्त अचलकुमार ज्योती यांनी आज दुपारी पत्रकार परिषद घेऊन गुजरात विधानसभेचा कार्यक्रम घोषित केला. २२ जानेवारी रोजी गुजरात विधानसभेचा कार्यकाळ संपत आहे. गुजरात विधानसभेच्या १८२ जागांसाठी निवडणुका होणार आहेत. या निवडणुकीत एकूण ४ कोटी ३३ लाख मतदार मतदानाचा हक्क बजावणार असून त्यासाठी ५० हजार १२८ मतदान केंद्र असणार आहेत. सर्व मतदान केंद्रांवर ईव्हीएम मशीन आणि व्हीव्हीपॅट मशीनचा वापर करण्यात येणार आहे. तसेच प्रत्येक मतदान केंद्रावर व्हिडिओ रेकॉर्डिंग करण्यात येणार आहे. त्याशिवाय मतदानानंतर मतदाराला फ्लॅश लाईट दाखवणार असून उमेदवाराची सर्व माहिती दाखवण्यात येणार आहे. गुप्तता राखण्यासाठी मतदानाच्या जागेची उंचीही वाढविण्यात येणार असल्याचं ज्योती यांनी सांगितलं.

असा आहे कार्यक्रम...

> २१ नोव्हेंबर रोजी अर्ज दाखल करता येईल
> २१ नोव्हेंबर रोजी अर्जांची छाननी करण्यात येईल
> २४ नोव्हेंबर रोजी अर्ज मागे घेता येईल
> संवेदनशील मतदान केंद्रांवर सीसीटीव्ही कॅमेरे असतील
> कुठलाही उमेदवार २८ लाखापेक्षा जास्त रक्कम खर्च करु शकत नाही.
> निवडणूक खर्चासाठी उमेदवाराला स्वतंत्र बँक खाते उघडावे लागेल
> उमेदवाराला २८ लाखाची खर्च मर्यादा देण्यात आली आहे
> १०२ मतदान केंद्रांवर महिला नियुक्त केल्या जातील
> मोबाइल अॅपच्या माध्यमातून निवडणूक आयोगाकडे तक्रार करता येईल तसेच फोटोही पाठवता येईल
> पेड न्यूजच्या प्रकारावर यंत्रणेचे लक्ष असेल

गुजरात विधानसभेचं पक्षीय बलाबल

> भाजप - ११५
> काँग्रेस - ६१
> अन्य - ०६
> एकूण - १८२