आंबेडकर आणि मोदी ब्राह्मणच: भाजप नेता

गांधीनगर: भाजप नेत्यांची बेताल बडबड काही थांबताना दिसत नाही. त्रिपुराचे मुख्यमंत्री विप्लव कुमार देव यांच्या पाठोपाठ आता गुजरात विधानसभेचे अध्यक्ष राजेंद्र त्रिवेदी यांनीही असंच एक विधान केलं आहे. भारतीय राज्यघटनेचे शिल्पकार डॉ. बाबासाहेब आंबेडकर आणि पंतप्रधान नरेंद्र मोदी दोघेही ब्राह्मण असल्याचं अजब विधान त्रिवेदी यांनी केलं असून त्यामुळे आश्चर्य व्यक्त केलं जात आहे.

'मेगा ब्राह्मण बिझनेस समिट'ला संबोधित करताना राजेंद्र त्रिवेदी यांनी हे विधान केलं आहे. 'बाबासाहेब आंबेडकरांना ब्राह्मण संबोधण्यात मला संकुचितपणा वाटत नाही. शिकलेल्या लोकांना ब्राह्मण म्हणणे गैर नाही. त्याच संदर्भात मोदीही ब्राह्मण ठरतात,' असं त्रिवेदी म्हणाले. या आधी त्रिपुराचे मुख्यमंत्री विप्लव कुमार देव यांनी सरकारी नोकऱ्यांच्या मागे लागण्यापेक्षा गुरं राखा किंवा पानटपरी सुरू करा, असा सल्ला तरुणांना दिला होता. त्यामुळे त्यांच्यावर चोहोबाजुंनी टीका झाली होती.