Gujarat CM Resigns: गुजरातचे मुख्यमंत्री विजय रुपाणी यांचा तडकाफडकी राजीनामा

अहमदाबाद : गुजरातचे मुख्यमंत्री विजय रुपाणी यांची शनिवारी तडकाफडकी राजीनामा देत अनेकांना आश्चर्याचा धक्का दिला आहे. पक्षात वेळोवेळी नेतृत्वबदल होतच असतात, असं त्यांनी मीडियाशी बोलताना म्हटलंय. पक्षात ही स्वाभाविक प्रक्रिया असल्याचा दावाही त्यांनी केलाय.


मला पाच वर्षांसाठी गुजरातच्या मुख्यमंत्रीपदाची जबाबदारी मिळाली हीच माझ्यासाठी खूप मोठी गोष्ट आहे. पक्षाध्यक्ष जे पी नड्डा यांचंही मार्गदर्शन माझ्यासाठी अभूतपूर्व राहीलं. यापुढे मला जी जबाबदारी दिली जाईल, ती मी मनापासून निभावण्याचा प्रयत्न करीन. आम्हाला पद नकोय तर जबाबदारी हवीय. मला आतापर्यंत जी जबाबदारी मिळाली ती मी पूर्ण केली, अशा भावना रुपाणी यांनी मीडियासमोर व्यक्त केल्या आहेत.

आम्ही राज्यातील निवडणुकाही नरेंद्र मोदींच्या नेतृत्वाखाली लढतो आणि २०२२ च्या निवडणुकाही त्यांच्या मार्गदर्शनाखाली लढवल्या जातील, असंही रुपाणी यांनी म्हटलंय.

PM Narendra Modi: 'महाराष्ट्र, केरळमधील कोविड रुग्णसंख्या पाहता आत्मसंतुष्टतेला जागा नाही'
sansad tv : PM मोदी लाँच करणार नवी वाहिनी, काँग्रेस नेत्याचा धर्मासंबंधित कार्यक्रम, सूत्रांची माहिती

अमित शहा अहमदाबादमध्ये

उल्लेखनीय म्हणजे, गेल्या काही दिवसांपासून गुजरात सरकारमध्ये नेतृत्व बदलाची शक्यता व्यक्त केली जात होती. केंद्रीय गृहमंत्री अमित शहा गुरुवारी रात्री ८.०० वाजता अचानक अहमदाबादमध्ये दाखल झाले होते. त्यांच्या कार्यक्रमाच्या आखणीत गुजरात दौऱ्याचा उल्लेख नव्हता. विमानतळावर अमित शहांच्या स्वागतासाठी राज्याचे गृहमंत्री प्रदीप सिंह जाडेजा, महापौर किरीट परमार आणि स्थायी समितीचे अध्यक्ष हितेश बारोट दाखल झाले होते.

गुरुवारी रात्री अमित शहा आपल्या बहिणीच्या घरी थांबले होते. त्यामुळे ते आपल्या कौटुंबिक कामासाठी इथे आल्याचा अंदाज व्यक्त केला जात होता. परंतु, आज अचानक मुख्यमंत्र्यांच्या राजीनामा सोपवला.

२६ डिसेंबर २०१७ ला दुसऱ्यांदा मुख्यमंत्रीपदाची शपथ

विजय रुपाणी यांनी २६ डिसेंबर २०१७ रोजी दुसऱ्यांदा गुजरातच्या मुख्यमंत्रीपदाची शपथ घेतली होती. भाजपनं गुजरातमध्ये १८२ पैंकी ९९ जागांवर विजय मिळवत बहुमत प्राप्त केलं होतं. विधिमंडळ दलाच्या बैठकीत रुपाणी यांची विधिमंडळ दलाचा नेता आणि नितीन पटेल यांना उपनेता म्हणून निवड करण्यात आली होती.