पहिली यादी जाहीर होताच भाजपमध्ये बंड

मटा ऑनलाइन वृत्त । गांधीनगर

गुजरात निवडणुकीसाठी भाजपनं उमेदवारांची पहिली यादी जाहीर करताच तिकीट न मिळालेल्या नाराजांनी भाजपमध्ये बंडाचं निशाण फडकावलं आहे. भाजपच्या प्रदेशाध्यक्षापासून अनेकांनी पक्षाचे राजीनामे दिल्याने भाजप नेतृत्वाचे धाबे दणाणले आहेत. या नाराजांची रात्रभर मनधरणी करण्यात आली असून स्वत: पक्षाचे राष्ट्रीय अध्यक्ष अमित शहा यांनी त्यासाठी पुढाकार घेतला होता, असं सूत्रांनी सांगितलं.

अमित शहा यांनी शुक्रवारी गुजरात विधानसभा निवडणुकीची पहिली यादी जाहीर केली. ७० उमेदवारांच्या या यादीत नाव न आल्याने नाराज झालेले गुजरात भाजपचे प्रदेशाध्यक्ष जितू वाघानी यांनी तात्काळ राजीनामा देत बंड पुकारले. त्यानंतर भरूच जिल्हा पंचायतीचे सदस्य वल्लभ पटेल यांनीही पक्षाचा राजीनामा दिला. त्यांना अंकलेश्वरमधून तिकीट देण्यात आली नव्हती. त्यांच्याऐवजी त्यांच्या भावाला तिकीट देण्यात आल्यानं ते नाराज होते. पटेल यांच्यापाठोपाठ भाजपचे महामंत्री दशरथ पुवार, दिनेश पटेल, कमलेश पटेल आणि चैतन्य सिंह या पक्षातील बड्या नेत्यांनीही अमित शहा यांच्याकडे राजीनामे सुपुर्द केले.

पक्षात लागोपाठ राजीनामा सत्र सुरू झाल्याने अमित शहा यांनी नाराजांची नाराजी दूर करण्यासाठी कंबर कसली. रात्रभर त्यांनी डॅमेज कंट्रोलचा वापर करून नाराजांची समजूत काढण्याचा प्रयत्न केला. पहाटेपर्यंत नाराजांचं म्हणणं ऐकून घेतलं जात होतं. त्यांना नव्या जबाबदाऱ्या देण्याचं आश्वासनही दिलं जात होतं. पण नाराजांची नाराजी दूर करण्यात त्यांना फारसं यश आलं नसल्याचं सूत्रांनी सांगितलं.