हार्दिकला झटका; पाटीदार नेत्याची भाजपला साथ

मटा ऑनलाइन वृत्त । अहमदाबाद

विधानसभा निवडणुकीच्या तोंडावरच गुजरातमध्ये मोठी राजकीय उलथापालथ झाल्याचे पाहायला मिळत आहे. पाटीदार आंदोलनाचे नेते केतन पटेल भारतीय जनता पक्षाच्या वाटेवर असल्याची माहिती आहे. पाटीदार आंदोलनाचा नेता हार्दिक पटेलसाठी हा मोठा झटका असल्याचे मानले जात आहे.

केतन पटेल हे हार्दिक पटेलच्या जवळचे मानले जातात. पाटीदार आरक्षण आंदोलनावेळी ते हार्दिकच्या सोबतच असायचे. मात्र, निवडणुकीच्या तोंडावर त्यांनी हार्दिकचा 'हात' सोडून भाजपला 'साथ' देण्याचा निर्णय घेतला आहे, असे समजते. हार्दिकसाठी हा मोठा झटका मानला जात आहे. याआधी रेश्मा पटेल आणि वरुण पटेल यांनीही भाजपत प्रवेश केला आहे. हार्दिकने समाजाचा विश्वासघात केल्याचा आरोप या नेत्यांनी केला होता. तसेच चिराग पटेल आणि महेश पटेल या दोघांनीही भाजपत प्रवेश केला आहे.