गुजरातमध्ये पेट्रोल-डिझेल स्वस्त

मटा ऑनलाइन वृत्त । अहमदाबाद

सर्वसामान्यांच्या आवाक्याबाहेर गेलेले पेट्रोल-डिझेलचे दर नियंत्रणात आणण्यासाठी व्हॅटमध्ये कपात करण्याचे आवाहन केंद्र सरकारने राज्यांना केल्यानंतर गुजरात सरकारने पेट्रोल-डिझेलवरील व्हॅट चार टक्क्यांनी कमी केला आहे. त्यामुळे गुजरातमध्ये पेट्रोल २.९३ रूपयांनी तर डिझेल २.७२ रूपयांनी स्वस्त झाले आहे. दरम्यान, गुजरातमध्ये विधानसभा निवडणुका असल्यानेच सरकारने हा निर्णय घेतला असल्याची टीका विरोधकांनी केली आहे.

गुजरातचे मुख्यमंत्री विजय रूपाणी यांनी इंधनावरील व्हॅट ४ टक्क्यांनी कमी करत असल्याची घोषणा आज केली. त्यामुळे गुजरातमध्ये आता ग्राहकांना एक लिटर पेट्रोलसाठी ६७.०३ रूपये आणि एक लिटर डिझेलसाठी ६०.७७ रूपये मोजावे लागणार आहेत. आज रात्री १२ वाजल्यापासून या किंमती लागू होणार आहेत.

महाराष्ट्राकडे लक्ष

दरम्यान, गुजरातपाठोपाठ महाराष्ट्रातही राज्यसरकार पेट्रोल-डिझेलचे दर कमी करण्याचा विचार करत असल्याचं सुत्रांनी सांगितलं. महाराष्ट्रात कमीत कमी २ ते ३ रूपयाने इंधनाचे दर कमी होण्याची शक्यता वर्तविली जात आहे. केंद्र सरकारने इंधनावरील अबकारी कर कमी केल्यानंतर राज्यांना तेलाच्या उत्पादनावरील व्हॅट कमी करण्याचे आवाहन केंद्रीय पेट्रोलियम मंत्री धर्मेंद्र प्रधान यांनी राज्यांना केलं होतं. त्याला गुजरातने प्रतिसाद देत इंधनावरील व्हॅट कमी केला.

सरकारने केलेल्या या आवाहानाला अनेक राज्यांनी नकारात्मक प्रतिसाद दिला होता. आमच्याकडे आधीच व्हॅट खूप कमी प्रमाणात आकारला जातो, त्यात आणखी किती कपात करायची? असा सवाल या राज्यांनी केंद्राला विचारला होता. तर बिहारचे मुख्यमंत्री नितीश कुमार यांनी पेट्रोलियम पदार्थांच्या उत्पादनावरील बेस प्राइज कमी करण्याचा सल्ला केंद्र सरकारला दिला होता.