हिंदीच्या पुस्तकात 'रोजा' संसर्गजन्य आजार!

मटा ऑनलाइन वृत्त । अहमदाबाद

येशू ख्रिस्ताला एका पाठात 'सैतान' संबोधून वाद ओढवून घेतलेल्या गुजरात शिक्षण मंडळाने आता नवा पराक्रम केला आहे. रमझानच्या पवित्र महिन्यात केला जाणारा उपवास 'रोजा' म्हणजे एक संसर्गजन्य आजार आहे, असा जावईशोध गुजरात पाठ्यपुस्तक मंडळाने लावला आहे. इयत्ता चौथीच्या हिंदी पाठ्यपुस्तकात हा उल्लेख आहे. चौकशीअंती ही 'प्रिंटींग मिस्टेक' असल्याचे बोर्डाने स्पष्ट केले. 'हैजा' ऐवजी 'रोजा' शब्द चुकून छापला गेला असे बोर्ड आता सांगत आहे.

लेखक प्रेमचंद यांची 'ईदगाह' नावाची कथा चौथीच्या हिंदी पाठ्यपुस्तकात पान क्र. १३ वर आहे. त्याखाली शब्दार्थ दिले गेले आहेत. त्यात 'रोजा' शब्दाचा अर्थ असा दिलाय - एक संक्रामक रोग जिसमे दस्त और काई आती है. म्हणजेच ज्यात जुलाब आणि उलट्या होतात असा संसर्गजन्य आजार.

जेव्हा गुजरात राज्य शालेय पाठ्यपुस्तक मंडळाचे (GSSTB) अध्यक्ष नितीन पेठाणी यांना याविषयी विचारण्यात आले तेव्हा त्यांनी ही छपाईची चूक असल्याचं सांगितलं. ते म्हणाले, 'ही छपाईची चूक आहे. 'हैजा' असा शब्द हवा होता, त्याऐवजी 'रोजा' हा शब्द चुकून छापला गेला आहे.' हे पाठ्यपुस्तक चौथी इयत्तेसाठी २०१५ पासून अभ्यासाला आहे, पण आधीच्या आवृत्त्यांमध्ये ही चूक नव्हते. २०१७ ला ज्या पुस्तकांची छपाई झाली त्यात ही चूक झाली.

'आम्ही हिंदी माध्यमाच्या मुलांसाठी आम्ही दुरुस्तीपत्रक जारी करू. या माध्यमातल्या विद्यार्थ्यांची संख्या कमी असल्याने १५ हजार प्रतीच छापण्यात आल्या आहेत,' असेही पेठाणी यांनी सांगितले.

मंडळाला कोणत्याही संघटनेकडून अधिकृत तक्रार आलेली नाही. मात्र अहमदाबादच्या आरटीई फोरमचे मुजाहिद नफीस यांनी सांगितले की, 'आमची संस्था पाठ्यपुस्तक मंडळ आणि राज्य सरकारकडे तक्रार करणार आहोत. धर्माशी संबंधित चुका स्वीकारल्या जाणार नाहीत. दोषींवर कारवाई करा, अशी मागणीही आम्ही करणार आहोत.'