साडीवर झळकली दोन हजाराची नोट!

मटा ऑनलाइन वृत्त । सूरत

नोटाबंदीचा निर्णय सध्या देशातील सर्वाधिक चर्चेचा विषय ठरलेला असताना ही संधी साधून सूरतमधील एका व्यापाऱ्याने चक्क २ हजार रुपयाच्या नोटेची प्रिंट असलेल्या गुलाबी साड्या बाजारात आणल्या आहेत. साड्यांसाठी प्रसिद्ध असलेल्या सूरतमध्ये सध्या या साड्यांच्या खरेदीसाठी मोठी झुंबड उडताना दिसत आहे.

सूरतमधील साड्यांचे व्यापारी शिव सैनी यांनी यांच्या कल्पनेतून या साड्यांची निर्मिती झाली आहे. या साडीआधी पंतप्रधान नरेंद्र मोदी यांचा चेहरा असलेली साडीही शिव सैनी यांनी बाजारात आणली होती. दोन हजाराच्या नोटेची प्रिंट असलेल्या या साड्या ६ मीटर लांबीच्या असून त्यावर २ हजार रुपयाच्या नोटेच्या ५०४ प्रिंट आहेत. या साडीची किंमत अवघी १६० रुपये इतकी ठेवण्यात आली आहे.

दरम्यान, उत्तर प्रदेश, उत्तराखंड, पंजाब, गोवा आणि मणिपूरमध्ये विधानसभा निवडणुकांची रणधुमाळी सुरू झाली असून त्याठिकाणी या साड्यांना मोठी मागणी असेल, असा दावा सैनी यांनी केला आहे.