जंगली जनावरासारखा वागला गुरमीत: कोर्ट

मटा ऑनलाइन वृत्त । चंदीगड

बलात्कारी बाबा राम रहीमला सीबीआयचं विशेष न्यायालय केवळ दहा वर्षाची शिक्षाच ठोठावून थांबलं नाही तर त्याच्या पापाचा पाढाच न्यायालयानं वाचून दाखवला. 'ज्यांनी तुला देवाचा दर्जा दिला. तुझी पुजा-अर्चा केली. त्यांच्याशीच तू जंगली जनावरासारखा वागलास. तुला कोणत्याही परिस्थितीत माफी देणं शक्यच नाही,' असं न्यायालयानं ठणकावलं. तेंव्हा राम रहीम ओक्साबोक्सी रडू लागल्याचं सुत्रांनी सांगितलं.

सीबीआय विशेष न्यायालयाचे न्यायाधीश जगदीप सिंह यांनी राम रहीमला शिक्षा ठोठावताना जबरदस्त सुनावलं. दोन्ही पीडीत महिलांनी तुला देवाचा दर्जा दिला होता. तू त्यांच्याशी असं दुष्कर्म करायला नको होतं, असं सांगतानाच बलात्कार म्हणजे केवळ शारिरीक शोषण नाही तर त्यामुळे पीडीत महिलेचं संपूर्ण आयुष्यच बर्बाद होतं, असंही जगदीप सिंह यांनी सुनावलं.

राम रहीमने अंधश्रद्धाळू साध्वींचा विश्वासघात केला. त्यांचं लैंगिक शोषण केलं. त्याच्या या कृत्यामुळे धार्मिक, सांस्कृतिक, अध्यात्मिक आणि सामाजिक संस्थांवर कलंक लागला आहे. त्यामुळे या धर्मसंस्थांचं होणारं नुकसान कधीच भरून निघणार नाही. राम रहीमवर विनाकारण दया दाखविल्यानं न्यायप्रणालीचं आणखीनच नुकसान होईल. त्यामुळे शासन आणि कायद्यावरचा विश्वास उडेल, असं स्पष्ट करत न्यायालयानं राम रहीमला दया दाखविण्यास नकार दिला. वाईट गोष्टी नष्ट करण्यासाठीच न्यायालयं आहेत. कठोर शिक्षेमुळे अशा प्रकारची मनोवृत्ती असणाऱ्यांना योग्य तो संदेश जाईल. त्यामुळे असा गुन्हा करण्याचे ते धाडस दाखविणार नाहीत, असंही न्यायालयाने सांगितलं.