हदीयाच्या वडलांचा भाजपमध्ये प्रवेश

तिरुअनंतपूरम : धर्मांतर करून विवाह केल्याप्रकरणात देशभर गाजलेल्या हदीयाचे वडील केएम अशोकन यांनी नुकताच भारतीय जनता पक्षात प्रवेश केला.

अशोकन सत्तारूढ मार्क्सवादी कम्युनिस्ट पक्षाचे कार्यकर्ते होते. मात्र शबरीमला प्रकरण या पक्षाने ज्या पद्धतीने हाताळले त्यावरून ते नाराज होते. त्यातूनच त्यांनी मार्क्सवादी कम्युनिस्ट पक्षावर जोरदार टीका करून भाजपचे सदस्य ऑनलाईन स्वीकारले. मंगळवारी त्यांना भाजपचे प्रदेश सरचिटणीस जी. गोपालकृष्णनन यांच्या हस्ते पक्षाचे ओळखपत्र प्रदान करण्यात आले. मार्क्सवादी कम्युनिस्ट पक्ष शबरीमला प्रकरणात खालच्या पातळीवरचे राजकारण करीत असल्याचा आरोप त्यांनी यावेळी केला. 'मी आणि माझे कुटुंबिय आम्ही कायम मार्क्सवादी कम्युनिस्ट पक्ष आणि डाव्या लोकशाही आघाडीला पाठिंबा दिला. पण हदीयासाठी सुरू असलेल्या कायदेशीर लढाईत आम्हाला या पक्षाचा कटू अनुभव आला. त्यांनी आमच्यासाठी काहीही केले नाही. किंबहुना ते आमच्याविरुद्ध उभे राहिले. ते तरी त्यांना टाळता आले असते,' असे अशोकन म्हणाले. भाजपमध्ये प्रवेश केला असला तरी पूर्णवेळ कार्यकर्ता होण्यासाठी आपण उत्सुक नसल्याचेही त्यांनी स्पष्ट केले. हदीया फोनवरून आपल्याशी बोलत असते असेही अशोकन म्हणाले. अशोकन यांच्याबरोबरच अन्य ५० जणांनीही यावेळी भाजपमध्ये प्रवेश केला.

हदीया हिचे मूळ नाव अखिला अशोकन होते. वयाच्या २३ व्या वर्षी तिने इस्लाम धर्माचा स्वीकार केला आणि नंतर शफीन जेहान याच्याशी विवाह केला. याप्रकरणी अशोकन यांनी 'लव्ह जिहाद'चा आरोप करीत न्यायालयाचे दरवाजे ठोठावले होते. हायकोर्टाने हा विवाह रद्द केला होता आणि हदीयाला पालकांच्या स्वाधीन केले होते. पण हदीयाच्या पतीने सुप्रीम कोर्टात धाव घेतली. कोर्टाने विवाह मान्य केला. त्यानंतर तिला पालकांच्या ताब्यातून मुक्त करण्यात आले. 'राष्ट्रविरोधी शक्ती त्यांच्या अजेंड्यासाठी वडलांची दिशाभूल करीत आहेत,' असा आरोप हदियाने केला होता.